Коронавирус инфекциясининг янги тўлқини муносабати билан Хитойнинг шимоли-шарқида 108 миллиондан ортиқ киши карантинга олинган. Бу ҳақда Bloomberg агентлиги маълум қилди, деб ёзмоқда «РБК».
Мазкур ҳудудда касалланиш бўйича 34 та янги ҳолат қайд этилганидан сўнг Цзилинь провинциясида автобус ва темир йўл қатновлари тўхтатилган, мактаблар ёпилган.
«Хитойнинг тезкор ва кучли реакцияси унинг инфекциянинг иккинчи тўлқини олдидаги қўрқувини акс эттиради, у вирус тарқалишини катта иқтисодий ва ижтимоий йўқотишлар билан ушлаб қолди. Шунингдек, бу Хитойда ва бошқа мамлакатларда қайта очилиш жараёни қанчалик кучсиз бўлишининг белгиси ҳисобланади, чунки ҳатто вируснинг қайта пайдо бўлиши ҳақидаги энг кичик белги ҳам қатъий изоляцияга қайтишга сабаб бўлиши мумкин», — деб ёзади агентлик.
Цзилинь провинцияси ва унинг шу ном билан аталувчи маркази вирус ўчоғи сифатида қаралмоқда. Қайд этилишича, мазкур провинцияда Хитойнинг бошқа ҳудудларида февраль ойида қўлланилмаган қатъий чоралар жорий қилинган.
Цзилинь провинциясида 34 та янги ҳолат қайд этилгани ҳақида Хитойнинг South China Morning Post нашри ҳам маълум қилган. Унинг маълумотларига кўра, провинцияда жойлашган Шулань шаҳри бутунлай ёпилган. Шунингдек, Цзилинь шаҳри ҳам қисман ёпилган. Провинцияга ҳукумат бош вазири ўринбосари бошчилигидаги комиссия жўнатилган. Олти нафар маҳаллий раҳбар, шу жумладан, Шуландаги коммунистик партия шаҳар қўмитаси раҳбари ва соғлиқни сақлаш бўйича шаҳар комиссияси раҳбари ишдан бўшатилган.
Шаҳарда қатъий изоляция жорий қилинган. Харид учун кўчага чиқишга бир оиладан фақат бир кишига икки кунда бир марта икки соат давомида рухсат этилади. Кириш-чиқиш нафақат Шуланда, балки унга яқин бўлган шаҳар ва қишлоқларда ҳам тақиқланган, шаҳар ўраб олинган.
South China Morning Post томонидан эълон қилинган мақолада мамлакат шимоли-шарқида жами қанча хитойлик янги изоляция чоралари остига тушгани ва карантин режими қанча давом этиши ҳақида маълумотлар йўқ.
Хитой соғлиқни сақлаш комиссияси маълумотларига кўра, 17 май куни мамлакатда коронавирус билан касалланиш бўйича еттита янги ҳолат қайд этилган. Эпидемия бошидан буён мамлакатда 82 954 киши касалланган, 4634 киши касаллик оқибатида вафот этган.
Изоҳ (0)