Таиландда барча мактаблар 1 июлда очилади ва машғулотлар қайта бошланади. Бу ҳақда Таиланд таълим вазири Наттхапхон Тхипсуван маълум қилди, деб ёзмоқда «РИА Новости».
Вазирнинг маълум қилишича, бу қатъий қарор бўлиб, мамлакатдаги барча мактаблар 1 июль куни ўз эшикларини очади. У ёки бу ҳудудда эпидемиологик вазият ёмонлашса, мазкур ҳудудда вирус тарқалишини чекловчи чоралар кўрилади. Агар ҳудудда вазият хавфли тус олса, у ердаги мактаблар онлайн режимга ўтказилади.
Вазирнинг қайд этишича, бундай ҳолатда мамлакатдаги ўрта таълимнинг бутун тизими масофавий режимга ўтказилмайди.
Одатда Таиландда ўқув йили май ойида бошланади ва февраль охирида якунланади. Ярим йилликлар ўртасидаги таътил сентябрь охиридан октябрь бошигача давом этади. Ёзги таътил эса мазкур мамлакатдаги энг иссиқ давр бўлган март ойи бошидан май ойи бошигача давом этади.
Айни пайтда мазкур мамлакатдаги барча мактаблар масофадан, смартфонлар ва компьютерлардан фойдаланган ҳолда онлайн режимда ишламоқда. Смартфони ва компьютери бўлмаган оилалар учун Таиланд Таълим вазирлигининг махсус таълим телеканали ишламоқда.
Таиландда 17 майдан коронавирус сабабли жорий қилинган чеклов чораларини енгиллаштириш бўйича иккинчи босқич бошланди. Савдо марказлари, баъзи спорт иншоотлари, ресторанлар ва истеъмол маҳсулотлари, қурилиш материаллари, электроника маҳсулотлари сотадиган дўконлар очилган.
Таиландда 18 май ҳолатига кўра, коронавирусга чалинганлар сони 3031 кишини ташкил қилмоқда, 56 киши касаллик оқибатида вафот этган, 2857 киши касалликдан тузалишга муваффақ бўлган. 18 май куни касалланиш билан боғлиқ учта янги ҳолат аниқланган. Мамлакат касалхоналарида COVID-19 касаллигига чалинган 118 киши даволанмоқда.
Аввалроқ Таиландда коронавирус чекина бошлагани ҳақида хабар берилган эди.
Эслатиб ўтамиз, Ўзбекистонда 30 мартдан бошлаб мактаблардаги дарслар видеодарс шаклида телеканаллар орқали эфирга узатилмоқда ва мазкур ўқув йили ана шу тартибда ўз ниҳоясига етказилади.
Изоҳ (0)