Албания президентининг рафиқаси Моника Кримади Тирана шаҳрида пойтахтнинг энг диққатга сазовор масканларидан бири Миллий театр бузилишига қарши намойишда иштирок этгани учун ҳибсга олинган. Бу ҳақда Albanian Daily News хабар қилган.
2018 йилда мамлакат бош вазири Эди Рама 1939 йилда қурилган театрга жуда ҳам кўп маблағ сарфланаётгани учун бинони бузишга буйруқ берганди. Рама унинг ўрнида ҳайкал ва янги театр биноси қурилишини қайд этган. Бу шаҳар аҳолисининг кескин норозилигига сабаб бўлган.
17 май тонгида шаҳарда яшовчи фуқролар театрни ўраб олиб, унинг бузилишига қарши намойиш ўтказди. Норозилик билдирган оломон ичида президентнинг рафиқаси, парламент аъзоси ва Социалистик партия етакчиси Моника Кримади ҳам бўлган. У намойиш ўтказаётган халқни қўллаб-қувватлаб, прокуратурадан фуқароларга қарши чиқаётган полициячиларга нисбатан чора кўришни сўраган. Кейинроқ Кримади ва яна бир нечта намойишчилар ҳибсга олинган. Оломон барибир ҳукуматнинг қарорига қарши чиқа олмади, театр биноси 18 май тонгида бузиб ташланди.
Albanian Daily News газетасининг ёзишича, Моника Кримади полиция маҳкамасидан чиқарилган. Унинг эри мамлакат президенти Илир Мета бинонинг бузилишига изоҳ бериб, содир бўлган воқеани кечирилмас жиноят деб атаган.
Изоҳ (0)