Андижон вилоятининг Улуғнор туманида балиқчиликка ихтисослашган хўжаликлар ташкил этилиб, интенсив балиқ етиштириш йўлга қўйилади, дея хабар беради «Дарё» мухбири.
Андижон вилоят ҳокимлигининг маълум қилишича, 2020 йил 7 май куни Президент раҳбарлигида бўлиб ўтган видеоселекторда Андижон, Навоий ҳамда Сурхондарё вилоятининг туман ва шаҳарлари иқтисодий салоҳиятини ошириш, аҳоли фаровонлигини юксалтириш ва оилаларни камбағалликдан чиқариш зарурлиги таъкидланган.
«Бунинг учун учта йўналиш — саноатни ривожлантириш ва хом ашёни қайта ишлаш, хизмат кўрсатишни яхшилаш, қишлоқ хўжалигида маҳсулот ишлаб чиқаришни кўпайтиришни ривожлантириш кераклиги айтилган эди», — дейилади вилоят ҳокимлиги ахборот хизмати хабарида.
Мазкур топшириққа кўра, Улуғнор туманининг Жалақудуқ даҳасида балиқчиликка ихтисослашган хўжаликларни ташкил этиш ва фаолиятини янада кенгайтириш мақсадида 60 гектардан ортиқ бўш, фойдаланилмаётган ерга интенсив балиқ етиштириш ишлари бошлаб юборилган.
«Ҳудуддаги аҳолини иш билан таъминлаш ва оилаларни камбағалликдан чиқариш мақсадида мавжуд ерлар ҳолати ўрганилиб, аҳолининг талаб ва истагига асосан ҳовузлар учун ер берилмоқда. Айни пайтда тегишли ташкилотлар томонидан ушбу майдонларни балиқчиликка мослаштириш, сув чиқариш ва электр тармоғини тортиб келиш мақсадида симёғочлар ўрнатиш ишлари амалга оширилмоқда. Балиқчилик комплекслари ташкил қилиниши натижасида 300 нафарга яқин Улуғнор аҳолиси бандлиги таъминланади», — дейди «Андижон балиқ саноат» корхонаси раҳбари Муҳаммадали Пўлатов.
Бундан ташқари, тадбиркорлар томонидан 24 гектар майдонда соғломлаштириш маркази, спорт комплекси ҳамда дам олиш масканлари ташкил этиш ҳам режалаштирилган бўлиб, балиқчилик соҳаси билан бирга экотуризмнинг ривожлантириш кўзда тутилган.
Давлат хизматлари агентлиги вилоят бошқармаси ахборот хизматининг маълум қилишича, Улуғнор туманида айни кунга қадар 22 та МЧЖ шаклидаги тадбиркорлик субъекти ҳамда балиқчилик билан шуғулланувчи фермер хўжалиги рўйхатдан ўтказилиб, фаолиятини бошлаган.
Изоҳ (0)