АҚШ аҳолисининг чоракдан кўпроқ қисми Хитой ишлаб чиқарган ҳар қандай маҳсулотни сотиб олмоқчи эмас. Бу ҳақда FTI Consulting ўтказган сўровнома натижаларида маълум бўлган ва бунга Bloomberg эътибор қаратган.
Респондентларнинг 40 фоизи ХХРда ишлаб чиқарилган товарни сотиб олмаслигини билдирган. Яна 34 фоизи Made in China («Хитойда ишлаб чиқарилган») белгиси бор маҳсулотни сотиб олиши, бироқ бундан хурсанд эмаслигини қайд этган. Иштирокчиларнинг 26 фоизигина Хитойдан олиб келинган товарлар уларнинг танловига таъсир кўрсатмаслигини маълум қилган.
Сўровномага кўра Маdе in China белгиси америкаликларнинг харид амалга оширишида бошқа омилларга қараганда асосий аҳамиятга эга. Америкаликларга ёқадиган ва улар бошқаларга нисбатан афзал биладиган маҳсулотлар Европада ишлаб чиқарилган товарлар, бу ердаги маҳсулотларни олмаслигини айтиб респондентларнинг 12 фоиз қисми овоз берган. Кейинги ўринда Лотин Америкаси мамлакатлари жой олди. Бу ердан олиб келинган маҳсулотларни сўровнома иштирокчиларининг 84 фоизи сотиб олиши мумкинлигини билдирган, 16 фоизи эса бундай қилмасликни афзал билган.
АҚШ аҳолисининг 78 фоизи ўз пуллар билан иқтисодий протекционизмни қўллаб-қувватлашга тайёрлигини билдирган. Улар маҳсулотнинг ишлаб чиқарилиши Хитойдан АҚШга ўтказилишини билишса, маҳсулотни қимматроқ харид қилиши мумкин. Сўровномада қатнашганларнинг 55 фоизи Хитойнинг АҚШ билан январда имзолаган савдо келишуви мажбуриятларини бажаришига ишонмаслигини айтган.
Сўровномада 18 ёшдан 91 ёшгача бўлган 1012 нафар киши иштирок этган. Тадқиқот 12—14 май кунлари ўтказилган. Статистик хатоликлар 3,09 фоиздан кўпроқ, деб баҳоланмоқда.
Bloomberg’нинг қайд этишича, бундай нуқтаи назар америкаликларга хос эмас ва улар одатда савдо эркинлиги ва радикал протекционизмга қарши чиқади. Агентлик ушбу хулосаларда Gallup’нинг ижтимоий тадқиқотларига таянган, унга кўра АҚШнинг бештадан тўртта аҳолиси халқаро савдони таҳдид эмас, имконият деб қабул қилади ва шундай хулосага келган америкаликлар сони охирги ўн йилликда сезиларли даражада ўсган. Бироқ икки давлат ўртасидаги келишмовчиликлар америкаликларнинг бу борадаги позициясига ҳам ўз таъсирини ўтказган. Бунда АҚШ ҳукуматининг турли баёнотлари ва бу борадаги кайфияти рол ўйнайди. Иқтисодий протекционизмнинг зарурлиги ҳақида президент Дональд Трампнинг ўзи бир неча бора таъкидлаб ўтган.
«Хитой Қўшма штатлардан йилдан йилга катта миқдордаги пулларни ўғирлаб келган. Бизнинг буюк Америка компанияларимизга буйруқ: зудлик билан Хитойдан олинадиган маҳсулотлар муқобилини топинг ва ишлаб чиқаришни ватанга қайтаринг», — деб ёзганди 2019 йил августида АҚШ президенти Twitter’да.
Пост остидаги изоҳларда фойдаланувчилар томонидан Дональд Трампни қўллаб-қувватловчи ташвиқот маҳсулотлари, жумладан, Маkе Аmеricа Grеаt Аgаin кепкалари айнан Хитойда ишлаб чиқарилиши ёзилган.
Хитой ва бошқа Осиё мамлакатларидан ишлаб чиқаришни АҚШ ҳудудига қайтариш маҳсулотларни арзонлаштиришга бўлган ҳаракат. Май ойи бошида Reuters АҚШ ҳукуматининг мамлакат компанияларини ишлаб чиқаришни ўз ҳудудига қайтаришга кўндирмоқчилиги ҳақида маълумот тарқатган. Бунинг учун бизнесга солиқ имтиёзлари ва махсус субсидиялар ажратилиши кўзда тутилган.
Изоҳ (0)