Туркия Соғлиқни сақлаш вазирлиги 20 майдан бошлаб дунёнинг 31 мамлакати, хусусан, Ўзбекистондан бўлган тиббиёт туристлари учун ўз чегараларини очишини маълум қилди, деб хабар беради Daily Sabah.
Янгиланган талабларга кўра, туристга икки киши ҳамроҳлик қилиши мумкин. Туркияга киришдан олдин улар COVID-19’га тест топширишлари ёки ўз мамлакатида ўтказилган тест натижаларини тақдим этишлари лозим.
Туркия ҳудудида кириб келган турист ва унинг ҳамроҳлари бевосита шифохонага етказилади ва улар мамлакатдан чиқиб кетгунига қадар шу ерда қолади. Шифохоналарнинг бир қавати ёки коридори айнан шу каби туристлар учун ажратиб қўйилади.
Таъкидлаш керакки, Туркия сўнгги йилларда тиббиёт туризми бўйича етакчи давлатлардан бирига айланди — 2018 йилда мамлакатда шу мақсадда қарийб 1 миллион хорижлик ташриф буюрган.
Туркия чегараларининг секин-аста очилиши мамлакат иқтисодиётининг қайта тикланиши учун ижобий таъсир кўрсатишга хизмат қилади.
Маълумот учун, 2019 йилда 52 минг чет эл фуқароси Ўзбекистонга даволаниш учун келган.
Изоҳ (0)