Бельгия пойтахти Брюсселда шифокорлар мамлакат бош вазири Софи Вильмесга норозилик сифатида уни «шармандалик йўлаги» билан кутиб олди. Воқеа тасвирланган видео YouTube’да пайдо бўлган.
16 май куни бош вазир мамлакатда коронавирус эпидемияси бошлангандан кейин илк бор пойтахтдаги 2 та шифохонага ташриф буюрган. Сен-Пьер шифохонасида унинг кортежи жонлантириш бўлими томон йўналаётганда, йўл бўйлаб тизилиб турган шифокорлар ва ҳамширалар бош вазир автомобилига намойишкорона тарзда тескари ўгирила бошлаган. Вильмес шифохонага кирганда ҳам тиббий ходимлар унга терс ўгирилиб, ўзларига қарсак чала бошлашган. Ушбу норозилик акциясида 120 га яқин одам иштирок этгани айтилмоқда.
Тиббий ходимларнинг бундай норозилик билдиришига уларнинг етарлича молиялаштирилмаётгани ва ҳукуматнинг тиббий ходимларни санитар инқироз ҳолатида иш вақтидан ташқари ишга чиқишга мажбурловчи қарори сабаб бўлган.
«Шифокорлар ўтган 2 ой ичидаги оғир меҳнат учун молиявий компенсациялар тўланиши ёки маошлар оширилишини талаб қилади. Шифокор ва ҳамшираларимиз шундоқ ҳам иш вақтидан ташқари ишламоқда ва ҳукуматнинг бунга мажбурловчи қарорлари қаттиқ норозиликни келтириб чиқаради», — дейди шифокорлар касаба уюшмаси вакили Дирк ван Овертвельдт.
Бош вазир бундай «совуқ» қабулга изоҳ бериб, тиббиёт ходимлар муаммоларини ҳал қилиш учун мулоқот зарурлигини айтган. «Бирор иш нотўғри кетаётганда эшитишни ва тушунтиришни билиш керак», — дейди Вильмес.
У тиббий ходимларни ҳам моддий, ҳам руҳий қўллаб-қувватлашга ваъда берган.
Касаба уюшмалари вакилларининг таъкидлашича, айнан Вильмес бюджет ишлари вазири лавозимини эгаллаган кезда тиббий хизмат кўрсатишга харажатларни кесиб ташлаган. Бельгияда тиббий ходимларга молиявий ёрдам кўрсатиш масаласи апрелдан бери кўрилмоқда, бироқ бу борада ҳали аниқ қарорлар қабул қилинмаган.
Сўнгги маълумотларга кўра, Бельгияда коронавирусга чалинганлар сони 55 минг кишидан ошган, мамлакатда вирус қурбонлари сони эса 9052 кишига етди.
Изоҳ (0)