Тожикистоннинг Хуросон туманида яшовчи 65 ёшли эркак кўчки қурбони бўлди. Бу ҳақда Asia-Plus хабар бермоқда.
Маълум бўлишича, отахон 15 май куни ўз қишлоғи яқинида содир бўлган селни телефонида видеога олаётган бўлган. Кучли ёмғир таъсирида у жойлашган тепалик ҳам кўчган ва у 30 метрлик лой остида қолган.
Қидирув ишлари ҳозирча ҳеч қандай натижа бермаган.
Хабарда айтилишича, сел тумандаги қўшни қишлоқларда ҳам маҳаллий аҳоли уйларига зарар етказган. Хавфсизлик қоидаларига риоя қилмаслик оқибатида 55 ёшли чўпон сел вақтида ҳалок бўлган.
17 май куни табиий офатдан жабрланган Хуросон тумани аҳолиси Бохтар-Душанбе йўлини тўсиб қўйган. Душанбе-Бохтар йўналишида қатновчи ҳайдовчининг айтишича, аҳоли вилоят ҳокимлигидан уларнинг муаммосига зудлик билан эътибор қаратишни ва селдан зарар етган уйларни қайта тиклашга ёрдам беришларини талаб қилиб қарийб 1 соат давомида йўлни тўсиб қўйган.
Мамлакат Ички ишлар вазирлиги матбуот хизмати Хурсонда табиий офат оқибатларини бартараф этиш ишлари олиб борилаётганини билдирган.
Аввалроқ Туркманободда ҳукумат довул оқибатларини икки ҳафтадан бери бартараф этмаётгани туфайли мингга яқин аҳоли норозилик намойишига чиққани хабар берилган эди.
Ўзбекистонда ҳам кучли ёғингарчилик оқибатида бир неча вилоятларда сел кузатилди. Хусусан, Самарқанд вилоятида содир бўлган сел натижасида Самарқанд—Қарши йўлини сув босди. Қашқадарёнинг Чироқчи туманига келган сел 32 та хонадонга талафот етказди. Навоий вилоятининг Зарафшон шаҳрига ярим тунда сел келиши оқибатида камида 300 киши эвакуация қилинди. Жиззах вилоятининг Шароф Рашидов туманлари ҳудудида кучли ёғингарчилик оқибатида бир неча маҳаллаларда ёмғир сувлари тўпланиб, бир неча хонадонга сув кирди.
Шунингдек, Сурхондарёда ҳам ёғган кучли ёмғир оқибатида сув тошқини юзага келиши мумкинлиги сабабли 900 нафар фуқаро эвакуация қилинган, Бўстонлиқ туманида ҳам сел кузатилиб, унинг оқибатларини бартараф этишга 14 та махсус техника жалб этилгани хабар берилганди.
Изоҳ (0)