Сирдарё вилоятида юз берган сув тошқини оқибатларини бартараф этиш, таъмирлаш ва тиклаш ишлари давом этмоқда. Фавқулодда вазиятлар вазирлиги шу пайтга қадар амалга оширилган ишлар ҳақида маълумот берди.
Ҳозирга қадар сув босган 25 та аҳоли пунктидан 13 таси сувдан тозаланган ва 20 та аҳоли пунктидаги хонадонлар ва уларнинг ҳудудлари чиқиндилардан тозаланган. Тозалаш ва қайта тиклаш тадбири бошидан 4515 та хонадон ва кўчмас мулк объектидан жами 3,846 миллион метр куб сув тортиб чиқарилган.
Ушбу тадбирларга Фавқулодда вазиятлар хизмати тизимининг жами 16 704 нафар шахсий таркиби ва 3233 та техникаси жалб этилган. Мазкур ишлар Фавқулодда вазиятлар вазирлиги томонидан мувофиқлаштирилмоқда.
Шу билан бирга, экин экиш имконияти мавжуд майдонларга Сурхондарё вилоятидан олиб келинган 1 миллион дона сабзавот кўчатини экиш ишлари бошлаб юборилган. Ҳозирга қадар 96 гектар томорқа майдонларига экин экилган.
Бундан ташқари, аҳоли бандлигини таъминлаш борасида ҳам ишлар олиб борилмоқда. Дастлабки манзилли рўйхат шакллантирилганда қурилиш ишларида тажрибаси бўлган 1408 нафар фуқаро аниқланди. Уларнинг 552 нафари жамоатчилик асосида ҳақ тўланадиган ишларга жалб этилди, шундан 256 нафари ободонлаштириш, 176 нафари чиқиндиларни саралаш ва 120 нафари қурилиш ишларига жалб қилинди.
Ҳудудлардаги электр энергияси таъминоти ҳам қайта тикланмоқда. Жумладан, 3 та подстанция, 97 та трансформатор пункти ва 302,5 километр электр узатиш тармоқларида 5500 та электр устунини таъмирлаш-тиклаш ишлари амалга оширилди. Натижада 7987 та электр таъминотидан узилган аҳоли хонадонининг барчаси тўлиқ электр манбаи билан таъминланди.
Туманларни табиий газ билан таъминлаш ишлари давом этмоқда. Тадбир бошидан 2,28 километр ва 7 та газ тақсимлаш қурилмаси демонтаж қилинди. Шунингдек, қўшимча равишда аҳолига 1000 дона маиший газ баллони ва 200 дона газ плитаси етказиб берилди.
Аввалроқ Сардоба, Оқолтин ва Мирзаобод туманларининг 12 та аҳоли пунктида электр таъминоти тўлиқ тиклангани ҳақида хабар берилганди.
Мавзуга доир: Фотогалерея: Сардоба фалокати оқибатларини бартараф қилиш бўйича ҳарбийлар томонидан амалга оширилаётган ишлар
Изоҳ (0)