Ўзбекистонда жорий йилнинг 18 май кунидан Тошкент шаҳридан Нукус, Урганч, Термиз шаҳарларига авиақатновлар ҳамда Тошкент шаҳридан Навоий, Бухоро, Қарши шаҳарларига «Афросиёб» тезюрар поезди ҳамда Фарғона водийсига темир йўл қатнови қайта тикланиши ҳақида хабар берилган эди. Мазкур қатновлардан фойдаланмоқчи бўлган йўловчилар учун коронавирус инфекциясига тест топшириш талаби белгиланган эди.
Карантин шароитида аҳолининг иқтисодий ҳолатини, шунингдек, ҳаракатланиш вақтида йўловчиларнинг ижтимоий масофа сақлашига шароит мавжудлигини эътиборга олиб, қолаверса, фуқароларнинг ҳудудлараро ҳаракатланишида ортиқча ноқулайликлар юзага келишининг олдини олиш мақсадида Республика махсус комиссияси томонидан ушбу талаб бекор қилинди.
Эндиликда юқорида кўрсатилган рейслар бўйича ҳаракатланаётган йўловчилардан коронавирус инфекциясига тест таҳлиллари олинганлиги ҳақидаги маълумотнома талаб этилмайди.
Шу билан бирга, авиа ва темир йўл қатновларини ташкил этишда барча карантин қоидаларига амал қилиш, шу жумладан, йўловчилар сонини камайтириш, дезинфекция қилиш ва бошқа санитария талаблари сўзсиз бажарилиши талаб этилади.
Эслатиб ўтамиз, Республика махсус комиссиясининг 2020 йил 14 майдаги қарори билан Ўзбекистонда карантин 1 июнгача узайтирилди. Шунингдек, Ўзбекистонда 18 майдан бошлаб шахсий автомобиллардан фойдаланиш учун енгилликлар киритилди.
Изоҳ (0)