Тошкентдаги Эпидемиология, микробиология ва юқумли касалликлар илмий-текшириш институти клиникасида 17 май куни 18 нафар бемор коронавирусдан соғайиб, реабилитацияга кузатилди, деб хабар бермоқда ССВ матбуот хизмати.
Тузалганларнинг 10 нафари эркак, 8 нафари аёллардир. Уларнинг 15 нафари чет элдан келган ва карантинга олинган. Коронавирус аниқлангач, клиникага ётқизилган. Қолган 3 нафари эса коронавирус инфекциясига чалинганлар билан мулоқот орқали касалликни юқтириб олган. Ҳудудлар кесимида оладиган бўлсак, 6 нафари Самарқанд вилоятидан, 3 нафардан Тошкент ва Қашқадарё вилоятларидан, 1 нафардан Тошкент шаҳри ва Фарғона, Хоразм вилоятларидан, 3 нафари эса Тожикистон республикасидан. Беморлар орасида энг ёши каттаси 66 ёшда бўлса, энг ёши кичиги 3 ёшли эгизаклардир.
Тошкент шаҳрида шу пайтга қадар 733 нафар бемор соғайган бўлса, эндиликда улар 751 нафарга етди.
Шу куни Наманганда 7 киши, Самарқандда 21 киши коронавирусдан тузалиб, Ўзбекистонда жами соғайганлар сони 2275 нафарга етгани хабар берилган эди. Энди эса соғайганларнинг умумий сони 2293 нафарни ташкил этмоқда.
Касалланганларнинг умумий сони эса 17 май соат 16:00 ҳолатига кўра, 2779 нафарга етди. Беморларнинг 12 нафари инфекция асоратлари оқибатида вафот этган. Айни пайтда 473 нафар бемор даволанишда қолмоқда.
Изоҳ (0)