Шавкат Мирзиёев коронавирусга қарши курашга оид фармонни имзолади

Шавкат Мирзиёев «Коронавирус пандемияси даврида тадбиркорлик субъектлари ва аҳолини қўллаб-қувватлаш бўйича навбатдаги чора-тадбирлар тўғрисида»ги фармонни имзолади.

Ҳужжатга кўра, 2020 йил 1 июндан 1 сентябрга қадар кичик тадбиркорлик субъектлари, бозорлар ва савдо мажмуалари, кинотеатрлар, умумий овқатланиш жойлари, жамоат транспортлари ташкилотлари, спорт-соғломлаштириш муассасалари, шунингдек, йўловчиларни ташиш, маиший хизмат кўрсатиш, ёпиқ жойларни ижарага бериш, шу жумладан, банкетлар ташкил этиш билан шуғулланадиган юридик шахслар мол-мулк ва ер солиғи тўлашдан озод этилади.

Кичик бизнес субъектларига:

• 2020 йил 9 мартдаги ва 2020 йил 3 апрелдаги Президент фармонларига мувофиқ, апрель май ойлари учун тақдим этилган мол-мулк ва ер солиғининг фоизсиз кечиктириш (бўлиб-бўлиб тўлаш) суммаларидан;
• 2020 йил 1 январдан бошлаб 2020 йил 15 майгача бўлган муддатда ер ва мол-мулк солиғи бўйича ҳисобланган пеня ва жарималардан воз кечилади.

Тадбиркорларга товарларни (ишларни, хизматларни) олиб киришда (импорт) қўшилган қиймат солиғини тўлашни 120 кунгача кечиктириш ҳуқуқи берилади.

2020 йил 1 майдан 1 июлгача микрофирмалар ва кичик корхоналар учун ижтимоий солиқ ставкаси 12 фоиздан 1 фоизгача пасайтирилади.

Устав фондида (устав капиталида) давлат улуши 50 фоиз ва ундан ортиқ бўлган давлат корхоналари ва юридик шахслар бундан мустасно.

Фармонда 2020 йил 15 май ҳолатига кўра солиқ қарзлари ва солиқ тўғрисидаги қонун ҳужжатларини бузганлик учун пеня ва ҳисобланган жарималар бўйича қарздорликларини ундириш 2020 йил 1 сентябргача тўхтатилиши, Давлат солиқ хизмати органлари 2020 йил 15 май ҳолати бўйича уларнинг банк ҳисобварақларидан пул маблағларини ўтказиш ва ечиб олиш бўйича инкассо топшириқномаларини қайтариб олиши ҳамда солиқ тўловчилар 15 май ҳолатига кўра бажарилмаган солиқ мажбуриятларини бажариш бўйича тўлов топшириқномаларини қайтариб олиш ҳуқуқига эгалиги белгилаб қўйилган.

1 июндан бошлаб қўшимча равишда 14 ёшгача фарзанди бўлган, 2 ёшгача бола парвариши учун ва моддий ёрдам олувчи оилаларга ажратиладиган ижтимоий ёрдам пуллари олувчилар 10 фоизга оширилади.