Тошкентдаги «Пойтахт» савдо маркази олдида жойлашган автотураргоҳ ўрнида нима қурилаётгани маълум бўлди

Тошкент шаҳрида жойлашган «Пойтахт» савдо маркази олдидаги автотураргоҳ ўрнида тўққиз қаватли тижорий бино қуриш режалаштирилмоқда. Бу ҳақда Тошкент шаҳар ҳокимлиги матбуот котиби Фурқат Маҳмудхўжаевга таяниб, «Gazeta.uz» хабар берди.

Унинг сўзларига кўра, бир йил аввал (2019 йил 28 мартда) шаҳар ҳокимининг қарорига асосан, Матбуотчилар кўчасидаги 23 сотихли ер майдони чехиялик инвестор — IMP NEW PAY компаниясига камида 25 миллион доллар инвестиция киритиш мажбурияти билан ажратиб берилган. Бироқ қурилиш ишлари энди бошланди, унинг нимага кечикканлиги маълум қилинмаган.

Нашрнинг ёзишича, «rejstrik-firem.kurzy.cz» сайтидаги компаниялар реестрига кўра, IMP NEW PAY компанияси Чехиянинг Карлов Вар шаҳрида 2016 йил 19 августда 1000 крон (40 доллар) устав капитали билан рўйхатга олинган. Компаниянинг асосий фаолияти сифатида бинолар, турар ва нотурар жойлар ижараси кўрсатилган. Компания таъсисчилари 95 фоиз улуш билан Ўзбекистондан Исроил Юнусов ва 5 фоиз улуш билан Германиядан Пол Брайтенбах ҳисобланади.

Қайд этилишича, Исроил Юнусов Lotus Gaz Invest компаниясининг 56,64 фоиз улушига ҳам эгалик қилади. Мазкур компания эса Real House қурилиш компанияси брендининг эгаси ҳисобланади. Шунингдек, Исроил Юнусов Ўзбекистон Профессионал бокс федерациясига раҳбарлик қилади.

Тижорий объект қурилиши лойиҳаси Тошкент шаҳар ҳокимлигида ўтган «Инвесторлар кунлари»нинг бирида тақдим этилган.

Бинонинг 1—3-қаватларида савдо объектлари жойлашади, қолган қаватларни офислар эгаллайди. Ер остидаги учта қаватда эса автотураргоҳлар жойлашади.

«Шаҳар марказидаги мазкур тураргоҳ аҳоли учун муҳим. Унинг ёнида сквер, иккита театр ва банк бор. Инвестор билан келишувнинг асосий шарти автотураргоҳ жойлари йўқолмаслиги бўлган», — деб таъкидлаган Фурқат Маҳмудхўжаев.

Унинг қўшимча қилишича, қурилиш тугаганидан кейин автомобиллар туриши учун мўлжалланган жойлар сони ҳозирги 180 тадан 250 тага ошади.

Матбуот котибининг маълум қилишича, мазкур ҳудуд инвесторга аукционсиз берилган, чунки ўша пайтда бундай талаб бўлмаган.

2018 йилнинг 15 августидан 2019 йилнинг 15 августигача Тошкент шаҳрида инвестицион муҳитни яхшилаш бўйича тажриба ўтказилган. Бу даврда шаҳар ҳокимлиги инвестицион фаолият учун ер участкаларини ва давлат мулки объектларини уларнинг майдонидан қатъи назар тўғридан-тўғри музокаралардан сўнг шартнома имзолаш орқали тақдим этиши мумкин бўлган.

Таъкидланишича, ерости автотураргоҳи аввалроқ бошланғич 7,5 миллиард сўм нарх билан аукционга қўйилган, бироқ унинг натижалари номаълум.