Ўзбекистон ТИВ Захарованинг рус тилидан фойдаланиш ўзбекистонликларнинг манфаатларига мос келиши ҳақидаги гаплари юзасидан изоҳ берди

Ўзбекистон Ташқи ишлар вазирлиги Россия ТИВ матбуот котиби Мария Захарованинг жамоатчиликда жиддий норозилик уйғотган ва муҳокамаларга сабаб бўлган баёнотига муносабат билдирди.

Хорижий давлатлар баъзи расмий шахсларининг Ўзбекистонда қонунчилик талабларига мувофиқ, жамоатчилик муҳокамасига киритилган давлат тили масаласи бўйича меъёрий-ҳуқуқий ҳужжат юзасидан билдирган фикрлари муносабати билан Ўзбекистон Ташқи ишлар вазирлиги қуйидагиларни қайд этади.

Давлат тилини тартибга солувчи соҳага боғлиқ масалалар давлатнинг мутлақ ички сиёсатига дахлдор бўлиб, ҳар қандай аралашув асло мақбул эмас.

Мамлакатимиз ҳудудида яшовчи барча миллат ва элатлар тилига ҳурмат билан муносабатда бўлиш республика қонунчилигида ўз ифодасини топган.

Ўзбекистон Республикаси Конституциясининг 4-моддасига мувофиқ, Ўзбекистон Республикаси ўз ҳудудида истиқомат қилувчи барча миллат ва элатларнинг тиллари, урф-одатлари ва анъаналари ҳурмат қилинишини таъминлайди, уларнинг ривожланиши учун шароит яратади.

Бундан ташқари, 1995 йилда қабул қилинган ‘Давлат тили тўғрисидаъги Ўзбекистон Республикаси қонунининг 9-моддасига биноан давлат ҳокимияти ва бошқарув органларида иш давлат тилида юритилади.

Шунингдек, қонун ўз она тилини ўрганиш ва ундан фойдаланиш, хусусан, таълим олиш, давлат ташкилотларига мурожаат қилиш, ҳуқуқий ва бошқа маълумотлардан фойдаланиш ҳамда ишбилармонлик муомаласида ҳеч қандай тўсиқларсиз қўллаш имкониятини кафолатлайди.

Кўплаб мактаб ва олий таълим муассасалари, жумладан, хорижий университетлар филиаллари, маданият марказларида ўқитиш, даврий нашрларни чоп этиш, теле ва радиодастурлар турли тилларда олиб борилаётгани буни яққол тасдиқлайди.

Шу муносабат билан Ўзбекистонда истиқомат қилувчи бошқа миллатлар ҳолати тўғрисида ташвишларга ҳеч қандай асос йўқ. Гап юқорида зикр қилинган 1995 йилда қабул қилинган қонун ижроси ҳақида кетмоқда.

Ташқи ишлар вазирлиги мамлакатимизда давлат тили ҳақидаги қонун талабларига риоя этиш билан боғлиқ масалаларни муҳокама қилиш жараёнида холис бўлишга, олдиндан асоссиз хулоса чиқармасликка ва ҳурмат сақланишига умид қилади.

Ўзбекистон Ташқи ишлар вазирлиги

Россия Ташқи ишлар вазирлигининг расмий вакили Мария Захарова 14 май, пайшанба куни ўтказилган брифинг вақтида «Ўзбекистонда иш юритиш жараёнларида рус тилидан фойдаланиш республика фуқароларининг манфаатларига мос келади», дея Ўзбекистонда рус тили билан боғлиқ вазиятга изоҳ берганди.

Олий Мажлис Қонунчилик палатаси депутати Расул Кушербаев ва «Юксалиш» умуммиллий ҳаракати раиси Акмал Бурҳонов, маданият вазири Озодбек Назарбеков Мария Захарованинг мазкур баёнотига ўз муносабатларини билдирган.

Эслатиб ўтамиз, апрель ойининг охирида Ўзбекистон Адлия вазирлиги давлат тилида иш юритишни таъминламаганлик учун мансабдор шахсларга жавобгарлик белгилашни назарда тутувчи қонун лойиҳасини ишлаб чиққан эди. Қонун лойиҳасига кўра, давлат органлари ва ташкилотларида иш юритишда давлат тили ҳақидаги қонун ҳужжатлари талабларига риоя этмаслик, мансабдор шахсларга базавий ҳисоблаш миқдорининг 2 бараваридан 5 бараваригача миқдорда жарима солишга сабаб бўлиши мумкин.