Ўзбекистон Соғлиқни сақлаш вазирлиги қошидаги Санитария-эпидемиологик осойишталик агентлиги коронавирус инфекциясини аниқлаш учун пуллик лаборатория хизматларини тақдим этиш тўғрисидаги низомни тасдиқлади. Бу ҳақда «Gazeta.uz» хабар берди.

Тасдиқланган тариф бўйича, COVID-19’га таҳлилни ўтказиш қиймати 224 415 сўмни ташкил этади. Тўлов терминал ёки банк тўлов квитанцияси орқали амалга оширилади. Хизмат учун нақд пул тўлаш тақиқланади.

Тест нархи қандай аниқланади?

Коронавирус бўйича текширув Novel Coronavirus (2019-nCOV) Nucleic Acid Diagnostic Kit ПЗР (полимер занжир реакцияси) таҳлили учун реагентлар жамланмаси ҳамда Хитойнинг Sansure Biotech компанияси ишлаб чиқарган РНК экстракцияси учун реагентлар жамланмаси ёрдамида олиб борилади.

Хизмат нархини ҳисоблаб чиқишда тест ўтказадиган мутахассислар — шифокор (3,47 миллион сўм), лаборант (2,2 миллион сўм) ва фаррошнинг (1,43 миллион сўм) ойлик маошлари ҳисобга олинган.

Таҳлил учун материаллар харажати — 169 097 сўм, иш вақти қиймати — 2900 сўм, ижтимоий суғурта ажратмаси — 725 сўм ва 13 818 сўмлик билвосита харажатлар билан жами хизмат таннархи 186 540 сўмни ташкил этмоқда. Агентлик ҳисобига ўтадиган 20 фоиз миқдоридаги рентабеллик билан ҳар бир таҳлил учун 27 981 сўм олинади.

Фойда солиғи (12 фоиз) хизмат нархини яна 3358 сўмга оширади. Юқори ташкилотга 2 фоизлик ажратма (6536 сўм) билан хизмат нархи жами 224 415 сўмга етади.

COVID-19 тестини қаерда топшириш мумкин?

Тошкентда таҳлилларни Республика ва Тошкент ОИТСга қарши курашиш марказлари лабораторияларида топшириш мумкин. Ҳудудларда эса тестлар Қорақалпоғистон ва вилоятлар Санитария-эпидемиологик осойишталик марказларининг лабораторияларида ўтказилади.

Аризачи тест натижалари ҳақидаги оригинал кўринишдаги маълумотни бевосита олиши ёки уни электрон почта ва Telegram орқали қабул қилиши мумкин.

Тест натижалари ҳақидаги гувоҳнома тўлов ҳақидаги квитанция тақдим этилгандагина ҳақиқий ҳисобланади.

Тест топшириш мумкин бўлган марказлар манзиллари

№	Ҳудуд номи	Хизмат кўрсатувчи муассаса	Манзил, телефон рақами
1	Тошкент шаҳри ва вилояти	Тошкент шаҳар ва вилояти Республика ОИТСга қарши курашиш маркази	Чилонзор туман, Фарҳод кўчаси 12-уй, +998712769325
		Тошкент шаҳар ОИТСга қарши курашиш маркази	Шайхонтоҳур тумани, Кўкча дарвозаси кўчаси 305-уй, +998712428134
2	Андижон вилояти	Андижон вилоят санитария-эпидемиологик осойишталик маркази	Андижон шаҳар, Бобур шоҳкўчаси, 5-уй, +998742276019
3	Бухоро вилояти	Бухоро вилоят санитария- эпидемиологик осойишталик маркази	Бухоро шаҳар, И.Муминова кўчаси. 29-уй, +998652230277
4	Жиззах вилояти	Жиззах вилояти санитария- эпидемиологик осойишталик маркази	Жиззах шаҳар, А.Азимов кўчаси, 1а-уй, +998722223786
5	Қашқадарё вилояти	Қашқадарё вилояти санитария- эпидемиологик осойишталик маркази	Қарши шаҳар, Амир Темур кўчаси, 74-уй, +998752250734
6	Навоий вилояти	Навоий вилояти санитария-эпидемиологик осойишталик маркази	Навоий шаҳар, Навоий кўчаси, 8-уй, +998782203015
7	Наманган вилояти	Наманган вилояти санитария-эпидемиологик осойишталик маркази	Наманган шаҳар, Шоҳрухобод кўчаси, 26- уй, +998692276293
8	Самарқанд вилояти	Самарқанд вилояти санитария-эпидемиологик осойишталик маркази	Самарқанд шаҳар, Исаева кўчаси, 40-уй, +998662311241
9	Сурхондарё вилояти	Сурхондарё вилояти санитария-эпидемиологик осойишталик маркази	Термиз шаҳар, И.Каримов кўчаси, 1-уй, +998762233208
10	Сирдарё вилояти	Сирдарё вилояти санитария-эпидемиологик осойишталик маркази	Гулистон шаҳар, Ибн Сино кўчаси, 15-уй, +998672263827
11	Фарғона вилояти	Фарғона вилояти санитария-эпидемиологик осойишталик маркази	Фарғона шаҳар, Табобат кўчаси, 26-уй, +998732263464
12	Хоразм вилояти	Хоразм вилояти санитария-эпидемиологик осойишталик маркази	Урганч шаҳар, А.Баҳодирхон кўчаси, 117-уй, +998622288373
13	Қорақалпоғистон Республикаси	Қорақалпоғистон Республикаси санитария-эпидемиологик осойишталик маркази	Нукус шаҳар, А.Шамуратова кўчаси, 11−7б, +998612248820

Эслатиб ўтамиз, Ўзбекистонда 2020 йилнинг 18 май кунидан бошлаб Тошкент шаҳридан Нукус, Урганч, Термиз шаҳарларига авиақатновлар ҳамда Тошкент шаҳридан Навоий, Бухоро, Қарши шаҳарларига «Афросиёб» тезюрар поезди ҳамда Фарғона водийсига темир йўл қатнови қайта тикланиши ҳақида хабар берилган эди. Мазкур қатновлардан фойдаланмоқчи бўлган йўловчилар учун коронавирус инфекциясига тест топшириш талаби белгиланган эди.

Бироқ карантин шароитида аҳолининг иқтисодий ҳолатини, шунингдек, ҳаракатланиш вақтида йўловчиларнинг ижтимоий масофа сақлашига шароит мавжудлигини эътиборга олиб, қолаверса, фуқароларнинг ҳудудлараро ҳаракатланишида ортиқча ноқулайликлар юзага келишининг олдини олиш мақсадида Республика махсус комиссияси томонидан ушбу талаб бекор қилинди.