Ижтимоий тармоқларда 12 май куни Сурхондарё вилояти Бойсун тумани ҳокимлиги эски бозорни буздириб, савдогарларни янги бозорга ўтказмоқчи эканлиги айтилган видео тарқалган эди. Туман ҳокимлиги бунга муносабат билдириб, бозор олдига келтирилган экскаватор бозорни бузиш учун эмас, балки оптик толали кабель ётқизиш учун жалб қилинганини айтганди.
Бироқ Ахборот технологиялари ва коммуникацияларини ривожлантириш вазирлиги Бойсуннинг «Тузбозор» маҳалласи ҳудудида жойлашган мазкур эски бозорга кириш қисмидаги чорраҳада турган экскаваторнинг «Ўзбектелеком» компанияси Сурхондарё филиали Бойсун телекоммуникация боғланмаси иш фаолиятига алоқаси йўқлигини, қурилиш ишлари 6 май куни тугатилганини билдирди.
Шундан сўнг, 17 май куни дастлаб Бойсундаги «Мустақиллик» маҳалласи ҳудудида янги барпо этилган «Деҳқон бозори»даги шароитлар билан танишган Сурхондарё вилояти ҳокими Тўра Боболов эски «Тузбозор» бузилмаслигини, аксинча, реконструкция қилиниб «Эко бозор»га айлантиришини айтди.
«Бу аҳолига кенг қулайликлар яратиш билан бирга, савдо хизмати кўрсатиш сифатини тубдан яхшилашга хизмат қилади. ‘Эко бозор’ битгач, хоҳловчилар у ерда савдо-сотиқ ишларини бемалол давом эттиришлари мумкин», – дея Тўра Боболовнинг сўзларини келтирмоқда вилоят ҳокимлиги ахборот хизмати.
Шундан сўнг Тўра Боболов эски бозорни ҳам бориб кўрган. Вилоят ҳокими бозордаги ҳаминқадар расталар, тор, айниқса, ёмғирли кунларда сув ва лой бўлиши сотувчи ва харидорларга қийинчиликлар туғдирган йўлакларни кўриб, «Тузбозор» ўрнида фаолиятини замонавий асосда йўлга қўйиш имконини берадиган янги типдаги бозор лойиҳасини тайёрлаш бўйича кўрсатма берди.
Изоҳ (0)