Хоразм вилоятида 17 май куни, тахминан, соат 17:00 ларда Хоразм вилоятига 15-25 метр/секунд тезлик билан кучли шамол оқими кириб келиши оқибатида корхона, ташкилот ва турар жойларнинг том қисмлари учиб кетган ва пастга қулаган. Бу ҳақда Хоразм вилояти ҳокимлиги матбуот хизмати хабар қилган.

Фото: Хоразм вилояти ҳокимлиги матбуот хизмати

Ушбу нохуш ҳодисалар оқибатларини бартараф этиш мақсадида Хоразм вилояти Фавқулодда вазиятлар бошқармасидан 3 та махсус техника ва 20 нафар шахсий таркиб жалб этилиб, зарурий чора-тадбирлар амалга оширилмоқда.

«Хоразм ҳудудий электр тармоқлари» АЖ ҳам юзага келган аварияларни бартараф қилишда навбатма-навбат электр узилишларини бартараф қилмоқда.

Фото: Хоразм вилояти ҳокимлиги матбуот хизмати

«Қисқа муддатда авариялар бартараф қилинади ва аҳолига электр энергияси етказилади», — дейилган ҳокимлик хабарида.

Фото: Хоразм вилояти ҳокимлиги матбуот хизмати

Фото: Хоразм вилояти ҳокимлиги матбуот хизмати

Фото: Хоразм вилояти ҳокимлиги матбуот хизмати

Бухорода 2020 йил 27 апрель куни юз берган кучли шамол оқибатида бир киши ҳалок бўлган, 41 киши жароҳатланган, шамолдан сўнг Бухоро, Навоий, Сирдарё ва Самарқанддаги салкам 140 минг хонадон газсиз қолган. Бухоро кучли шамолдан сўнг электр таъминотида энг катта талафот кўргани хабар қилинган.

Бухорода 27 апрель шамолидан сўнг Қоракўл ва Олот туманлари билан алоқа узилиб қолганидан кейин Қоракўл ва Олотда тошқин ҳақида асоссиз миш-миш тарқалган ва туман аҳолиси 28 апрель куни ўз хонадонларини тарк эта бошлади. Ижтимоий тармоқларда трактор тиркамасида Бухоро шаҳри томон кетаётган қоракўлликлар видеоси ҳам пайдо бўлган. Кейинроқ сув тошқини ҳақида ёлғон хабар тарқатган шахслар аниқланди.

Президент Шавкат Мирзиёев Бухорода юз берган кучли шамол оқибатларини кўздан кечириш учун вилоятга ташриф буюрган ҳамда Олот ва Қоракўлда табиий офат оқибатларини кўздан кечирган.

Олот ва Қоракўл туманларида кузатилган ёмғир аралаш кучли шамол оқибатларини бартараф қилиш учун давлат бюджетидан 100 миллиард сўм ажратилган.