Xorazm viloyatida 17-may kuni, taxminan, soat 17:00 larda Xorazm viloyatiga 15-25 metr/sekund tezlik bilan kuchli shamol oqimi kirib kelishi oqibatida korxona, tashkilot va turar joylarning tom qismlari uchib ketgan va pastga qulagan. Bu haqda Xorazm viloyati hokimligi matbuot xizmati xabar qilgan.
Ushbu noxush hodisalar oqibatlarini bartaraf etish maqsadida Xorazm viloyati Favqulodda vaziyatlar boshqarmasidan 3 ta maxsus texnika va 20 nafar shaxsiy tarkib jalb etilib, zaruriy chora-tadbirlar amalga oshirilmoqda.
“Xorazm hududiy elektr tarmoqlari” AJ ham yuzaga kelgan avariyalarni bartaraf qilishda navbatma-navbat elektr uzilishlarini bartaraf qilmoqda.
“Qisqa muddatda avariyalar bartaraf qilinadi va aholiga elektr energiyasi yetkaziladi”, — deyilgan hokimlik xabarida.
Buxoroda 2020-yil 27-aprel kuni yuz bergan kuchli shamol oqibatida bir kishi halok bo‘lgan, 41 kishi jarohatlangan, shamoldan so‘ng Buxoro, Navoiy, Sirdaryo va Samarqanddagi salkam 140 ming xonadon gazsiz qolgan. Buxoro kuchli shamoldan so‘ng elektr ta’minotida eng katta talafot ko‘rgani xabar qilingan.
Buxoroda 27-aprel shamolidan so‘ng Qorako‘l va Olot tumanlari bilan aloqa uzilib qolganidan keyin Qorako‘l va Olotda toshqin haqida asossiz mish-mish tarqalgan va tuman aholisi 28-aprel kuni o‘z xonadonlarini tark eta boshladi. Ijtimoiy tarmoqlarda traktor tirkamasida Buxoro shahri tomon ketayotgan qorako‘lliklar videosi ham paydo bo‘lgan. Keyinroq suv toshqini haqida yolg‘on xabar tarqatgan shaxslar aniqlandi.
Prezident Shavkat Mirziyoyev Buxoroda yuz bergan kuchli shamol oqibatlarini ko‘zdan kechirish uchun viloyatga tashrif buyurgan hamda Olot va Qorako‘lda tabiiy ofat oqibatlarini ko‘zdan kechirgan.
Olot va Qorako‘l tumanlarida kuzatilgan yomg‘ir aralash kuchli shamol oqibatlarini bartaraf qilish uchun davlat budjetidan 100 milliard so‘m ajratilgan.
Izoh (0)