Мактабгача таълим вазирлиги Ўзбекистонда кўпчилик ота-оналарни қизиқтираётган асосий савол — боғчаларнинг қачон ишга тушишига аниқлик киритди.
Вазирлик ахборот хизмати бу саволга ойдинлик киритиб, ота-оналар ва мактабгача таълим ташкилотлари раҳбарлари эътиборига қуйидагиларни маълум қилган:
«Республика махсус комиссиясининг 2020 йил 8 майдаги алоҳида ҳудудларда карантин чораларини юмшатиш ҳақидаги қарорига қарамай, хавфсизликни таъминлаш мақсадида таълим муассасалари ва ўқув курслари, шу жумладан, давлат, хусусий, оилавий, давлат-хусусий шериклик асосидаги мактабгача таълим ташкилотлари (МТТ) фаолиятига чеклов ўз кучида қолади.
Ушбу чеклов чораларини узайтиришдан мақсад болалар хавфсизлигини таъминлаш ва уларнинг саломатлигини коронавирус инфекциясини юқтириб олиш хавфидан ҳимоя қилишдир.
Карантин чораларини юмшатиш босқичма-босқич амалга оширилади ва МТТлар фаолияти болалар томонидан коронавирус инфекциясини юқтириб олиш хавфи тўла бартараф этилганидан кейин тикланади.
Ўзбекистонда болалар саломатлиги учун хавфсиз эпидемиологик вазият барқарорлашгач, Мактабгача таълим вазирлиги МТТлар фаолияти тикланиши ҳақида қўшимча маълум қилади», — дейилган вазирлик хабарида.
Изоҳ (0)