Андижон вилоятининг Андижон туманида қувурдан нефть маҳсулотларини ўғирлаётган шахслар қўлга олинди. Бу ҳақда «Дарё» мухбири хабар бермоқда.
Андижон вилоят ИИБ ахборот хизматининг маълум қилишича, 2020 йил 13 майдан 14 майга ўтар кечаси Андижон туманида яшовчи фуқаро Д.Х. бошчилигидаги бир гуруҳ шахслар «Гулистон» маҳалласида жойлашган «Абдурашид ҳосили» фермер хўжалиги ер майдонидан ўтган Andijanpetro МЧЖга қарашли нефть қувурларига махсус мослама ўрнатиб, кўп миқдордаги нефть маҳсулотларини яширин тарзда ўғирлаётган вақтда қўлга олинган.
Иш бўйича улардан 35 дона махсус тайёрланган қопда нефть маҳсулотлари, 30 дона бўш қоп, темир трубага уланган махсус мослама ҳамда саккиз метр ҳажмдаги целлофан олинган.
Andijanpetro МЧЖ томонидан берилган маълумотга кўра, ўша куни жамиятга тегишли 10 миллион 500 минг сўмлик нефть маҳсулотлари талон-торож қилинган ҳамда марказий қувурга шикаст етказилиб, яроқсиз ҳолга келтирилган.
Мазкур ҳолат юзасидан 14 май куни қўлга олинган шахсларга нисбатан Жиноят кодексининг 169-моддаси 3-қисми «г» банди (Ўғирлик) ва 255-2-моддаси 2-қисми «б» банди (Нефть қувурларини, газ қувурларини, нефть ва газ маҳсулотлари қувурларини яроқсиз ҳолатга келтириш) билан жиноят иши қўзғатилган.
Ҳозирда мазкур жиноят иши бўйича тергов ҳаракатлари олиб борилмоқда.
Изоҳ (0)