Ўзбекистонда коронавирусга чалинганларнинг яна 32 нафари тузалиб, жами соғайганлар сони 2245 нафарга етди. Бу ҳақда ССВ матбуот хизмати хабар бермоқда. Бухорода 7 киши, Андижонда 1 киши, Тошкентда эса 24 киши соғайиб, реабилитацияга кузатилган.
Бухоро вилоятида тузалганларнинг барчаси ушбу ҳудуддан (5 нафари Бухоро шаҳридан, 1 нафардан Когон ва Ғиждувон туманларидан) бўлиб, барчаси коронавирус инфекциясига чалинганлар билан мулоқот орқали касалликни юқтириб олган. Уларнинг 2 нафари эркак, 5 нафари аёл, энг ёши каттаси 52, ёши кичиги эса 3 ёшда экани айтилди.
Қайд этилишича, Бухоро вилоятида шу пайтга қадар 433 нафар бемор соғайган бўлса, эндиликда улар 440 нафарга етди. Айни пайтда шифокорлар вилоятдаги 2 нафар беморга тегишли стандартлар бўйича даво чораларини кўрмоқда.
Андижон вилоятида соғайган 42 ёшли эркак Пахтаобод туманидан бўлиб, узоқ масофага қатновчи юк автомашина ҳайдовчисидир. Вилоятда шу пайтга қадар 162 нафар бемор соғайган бўлса, эндиликда улар 163 нафарга етди.
Тошкент шаҳридаги Вирусология илмий-текшириш институти клиникасида тузалганларнинг 9 нафари касалликни коронавирус инфекциясига чалинганлар билан мулоқот орқали юқтириб олган. 2 нафар фуқаро Шаржа-Тошкент йўналишидаги чартер рейсда БААдан олиб келинган, 12 нафар фуқаро Тожикистондан келган ва 1 нафари узоқ масофага қатновчи юк автомашина ҳайдовчиси бўлиб, Россиядан Қозоғистон орқали келган. Уларнинг барчаси карантинга олинган ва коронавирус аниқлангач, клиникага ётқизилган.
Соғайганларнинг орасида 6 нафардан Тошкент шаҳри ва Тошкент вилоятидан, 5 нафари Сурхондарё вилоятидан, 4 нафари Қашқадарё вилоятидан, 2 нафари Фарғона вилоятидан ва 1 нафари Хоразм вилоятидан. Улардан 13 нафари эркак, 11 нафари аёл бўлиб, энг ёши каттаси 57 ёшда бўлса, энг ёши кичиги 13 ёшда.
Тошкент шаҳрида шу пайтга қадар 709 нафар бемор соғайган бўлса, эндиликда улар 733 нафарга етди.
16 май куни Ўзбекистонда коронавирусдан соғайганлар сони 2213 нафарни ташкил қилаётгани хабар берилганди. Энди улар сони 2245 нафарга етди.
Касалланганларнинг умумий сони эса 17 май соат 15:50 ҳолатига кўра, 2746 нафарни ташкил қилмоқда. Шунингдек, коронавирусга чалинган яна бир бемор вафот этиб, касаллик қурбонлари сони 12 кишига етди.
Изоҳ (0)