Қашқадарё вилоятининг Чироқчи туманидаги Қизилчовра қишлоғига келган сел 32 та хонадонга талафот етказди. Иккита уй эса қулаб тушди. Бу ҳақда «Дарё»га маълум қилган аҳоли вакилларининг сўзига кўра, воқеа жорий йил 8 май куни кеч соат 20:00 да содир бўлган.
«Кечки пайт 19:30 да дўл аралаш жала ёға бошлади. Соат 20:00 га бориб эса қишлоққа сел келди. Сел дастлаб ҳовлимизга сизиб кирди. Ҳовлига кирган сувнинг баландлиги ярим метрга етди», — дейди уйига сув кирган фуқаро Суннат Товшаров.
Суннат Товшаровнинг айтишича, отаси яшаётган уй сел оқибатида қулаб тушган.
«Отамни уйдан ўз вақтида олиб чиққан эканмиз. Йўқса, ичкарида қолиб кетаркан», — дейди Суннат Товшаров.
Қизилчовра қишлоғида яшовчи Наргиза Бойжигитованинг айтишича, селдан хабар топиб ҳудудга келган Фавқулодда вазиятлар ҳамда Ёнғин хавфсизлиги ходимлари аҳолига ёрдам беришга ожизлик қилган.
«Уйимизга сув тошди. Ёрдамга келган ходимларга ‘ҳовлидаги сувни чиқаришда ёрдам беринғ дея қанча айтмайлик, ёрдам беришолмади», — дейди Наргиза Бойжигитова.
Аҳоли вакилларининг маълум қилишича, мазкур сел жала оқибатида юзага келган бўлиб, қишлоқдаги фермер хўжалиги даласидан аҳоли хонадонларига кириб борган.
«Фермерлар экин майдони олдидаги зовур ўз вақтида тозаланмагани боис, экин майдонидан тушган сув зовурдан тошиб, тўғри биз яшаётган уйларга келди ва хонадонларимизни сув босди», — дейди аҳоли вакиллари.
Фавқулодда вазиятларнинг туман бўлинмаси бошлиғи Озодбек Жаҳбаровнинг тасдиқлашича, сел аҳоли хонадонларига, ҳақиқатан, фермер хўжаликлари даласидан кирган.
«Аҳоли хонадонлари фермер даласидан пастда жойлашгани, қолаверса зовур тўлиб кетгани боис даладаги сув аҳоли хонадонларига кириб келган. Ва 32 та хонадонга талафот етказган. Иккита уй эса қулаб тушиб, яшаш учун хавфли ҳолатга келган», — дейди Озодбек Жаҳбаров.
Фавқулодда вазиятлар бўлими масъулининг қўшимча қилишича, аҳолининг яшаш уйларидан ташқари ошхона, молхона ва қўшимча бинолари ҳам қулаб тушиб, экин майдонлари лойқа сув остида қолган.
Яшаш уйи қулаб тушган Шобдулла Менглиевнинг айтишича, сел кечки пайт соат 20:00 да кела бошлаган бўлса, уй деворларига зарар етиши оқибатида тонгда, тахминан 03:00 ларда қулаб тушган.
«Ҳамма жойни сув босиб кетгани боис, 75 ёшли отам ва онамни касал бўлишига қарамасдан ташқарига олиб чиқдик. Уларни бошқа уйга олиб кирдик. Аммо бошқа уйимизни ҳам сув босди. Ҳамма жой лойқа сув бўлди. Катта уйимиз эса тонг азон соат 03:00 да гурсиллаб қулади», — дейди Шобдулла Менглиев.
Маълум бўлишича, қишлоқда қулаб тушган ҳар икки уй ҳам 1990 йилларда қурилган уйлар бўлган.
Уйи қулаб тушган 75 ёшли Чўлбуви момо Бойназарованинг айтишича, уйсиз қолгач, қўшнисининг уйидан қўним топган.
«Бир ҳафтадан бери уйсиз, қаровсиз қолиб кетдим. Бобо катта ўғлимникида яшаяпти. Мен эса уйимни кўриб туришим кераклиги учун қўшнимнинг қурилиши битмаган хонасида яшаб турибман», — дейди Чўлбуви момо Бойназарова.
Аҳоли вакилларидан Ўктам Дилмуродовнинг маълумот беришича, бевақт келган сел унинг нафақат уйига, томорқасидаги экинлари-ю, ҳар йили ҳосил оладиган бананларига ҳам зарар етказган.
«Шу уй-жой ва томорқа учун топган-тутганимизни сарф қилгандик. Лекин ҳаммаси бир кунда барбод бўлди. Ўғлим ҳали ҳам Россияда юрибди. Ишлаб, пул топиб келаман деб, карантин сабаб ўзга юртда қолиб кетди. Энди эса бу дард устига устак бўлди», — дейди Ўктам Дилмуродов.
Чироқчи туман ҳокимлиги ахборот хизмати раҳбари Собит Раимқуловнинг маълумот беришича, мазкур воқеадан хабар топган туман ҳокими 9 май куни қишлоққа борган ва селдан талафот кўрган хонадон вакиллари билан суҳбатлашган.
Изоҳ (0)