BMW компанияси зирҳланган BMW X5 Protection VR6 моделининг Калашников автоматидан ўтилган ўқдан қочишга урингани тасвирланган видео билан бўлишди.
«Пойга» номли роликнинг бошида ичида йўловчи бўлган зирҳли йўлтанламас ҳайдовчиси тупроқ йўлдаги турли тўсиқлар орасида манёврларни амалга оширади. Шундан сўнг, BMW асфальтланган трассага чиққанида «АК-47» автоматидан ўқ узилиб, автомобиль ва ўқ ўртасида пойга бошланади.
Аввалига зирҳланган Х5 ўқ билан тўқнашувдан қочиш учун тезликни оширишга уринади, табиийки, бунинг уддасидан чиқа олмайди. BMW X5 Protection VR6’нинг максимал тезлиги соатига 210 километрни ташкил этади. «АК-47»дан узилган ўқнинг бошланғич тезлиги эса сониясига 715 метрга тенг бўлиб, соатига 2,5 минг километрга қадар етади.
Ўқдан қочишга уринган ҳайдовчи охир оқибат у билан тўғридан-тўғри тўқнашишга қарор қилади. Роликда ўқнинг Х5’га урилиши тасвирланган, бироқ ўқ нишонга теггач, зирҳли автомобилга ҳеч қандай зарар етказмай, ерга тушганини кўриш мумкин.
BMW X5 Protection VR6 калибри 7,62 миллиметрга тенг Калашников автомати ўқлари, DM51 қўл гранатаси портлаши ва автомобилдан тўрт метр узоқликда портловчи 15 килограмм тротилдан ҳам ҳимоя қилишга қодир. Автомобиль Х5 М50i базасида яратилган бўлиб, унга 530 от кучига эга 4,4 литрли V8 битурбомотори ўрнатилган.
Изоҳ (0)