Twitter ўз ходимларига коронавирус пандемияси якунланганидан кейин ҳам масофадан туриб ишлаш режимидан воз кечмасликка ва доимо шу тартибда ишлашга рухсат берди. Бу ҳақда компания раҳбари Жек Дорсининг баёнотига таяниб, CBS News хабар берди.
«Сўнгги бир неча ой биз бу каби режимда ҳам ишимизни уддалай олишимизни кўрсатди. Шу сабабли ходимларимизнинг вазияти уларга уйдан туриб ишлаш имконини берса, биз бунга рухсат берамиз», — дейди Дорси.
Унинг сўзларига кўра, Twitter офислари ходимлар учун сентябрдан олдин очилмайди. Бироқ бу амалга ошган тақдирда ҳам аввалги иш режимига қайтиш босқичма-босқич амалга оширилади. Кўплаб хизмат сафарлари қайта тикланмайди ва 2020 йилнинг охирига қадар ҳеч қандай корпоратив тадбирлар ўтказилмайди.
Аввалроқ Google ва Facebook ўз ходимларига йил охирига қадар масофадан туриб ишлаши мумкинлиги ҳақида хабар берилганди.
Маълумот учун Google коронавирус туфайли ўз ходимларига уйдан ишлашни тавсия қилган, Apple раҳбари ҳам ишчиларга уйдан ишлашга рухсат берган, Японияда эса давлат идораларига ходимларини уй шароитида ишлашга ўтказиш буюрилган.
Изоҳ (0)