Илон Маск АҚШнинг Калифорния штати Аламида округи ҳукумати томонидан жорий қилинган тақиққа қарамасдан, мазкур округдаги Tesla заводининг иши қайта тикланганини маълум қилди. Бу ҳақда TJournal хабар берди.
Маскнинг маълум қилишича, у айни пайтда заводда бўлиб турибди. Шунингдек, тадбиркор агар округ расмийлари кимнидир ҳибсга олишни режалаштираётган бўлса, фақат уни ҳибсга олишни сўраган.
Калифорния штатида коронавирус тарқалгани сабабли ёпилган корхоналарга 7 майдан бошлаб фаолиятни қайта тиклашга рухсат берилган. Бунда штат раҳбарияти маҳаллий бошқарув органлари тақиқларни узайтириши мумкинлигини маълум қилган.
Аламида округида чекловлар май ойининг охирига қадар амалда бўлади. Округ расмийлари Tesla фаолиятини қайта тиклаши мумкин бўлган компаниялар қаторига кирмаслигини билдирган.
Бунга жавобан Илон Маск компания штаб-квартирасини бошқа штатга кўчириш билан таҳдид қилган. У расмийларнинг қарорини конституцияга зид деб атаган ва компания округни судга беришини маълум қилган.
АҚШ президенти Дональд Трамп Tesla раҳбарини қўллаб-қувватлаган. Президент Калифорния штати Tesla’га ва Илон Маскка заводни очишга рухсат бериши кераклигини, буни айни пайтда тез ва хавфсиз бажариш мумкинлигини таъкидлаган.
Март ойининг бошида Илон Маск коронавирус атрофидаги ваҳимани аҳмоқлик деб атаганди ҳамда америкаликларнинг автоҳалокат оқибатида вафот этиши эҳтимоли коронавирусдан ўлишдан юқорироқ эканини айтганди. Кейинроқ Илон Маск коронавирус сабаб бир ҳафта ичида 5,5 миллиард доллар миқдоридаги маблағни йўқотди. Март ойининг охирига келиб Илон Маск коронавирусни даволаш йўлида сунъий нафас олдириш аппаратларини тарқатди.
Изоҳ (0)