Афғонистонда жангарилар туғруқхонага қуролли ҳужум уюштириши оқибатида камида 16 нафар одам ҳалок бўлди, қурбонлар орасида оналар ва болалар ҳам бор. Бу ҳақда Reuters хабар берган.
Хабарга кўра тиббиёт муассасасида аввалига портлаш юз берган, шундан кейин террорчилар ичкарига бостириб кирган ва одамларни ўққа тутган. Пойтахт Кобул шаҳрининг ғарбий қисмида жойлашган бинода камида 16 кишининг, жумладан, икки нафар чақалоқнинг ҳалок бўлгани айтилмоқда, яна 15 нафар одам турли даражада яраланган.
Мамлакат Ички ишлар вазирлигининг хабарига кўра худкуш террорчилар ҳарбий кийимда бўлган ва уларнинг ҳаммаси йўқ қилинган. Афғонистон президенти Ашраф Ғани кучишлатар тизимларга террорчиларга тезкор жавоб ҳужуми уюштиришни буюрган. Афғонистоннинг биринчи вице-президенти Амрилло Солиҳ ҳам ушбу ҳужум ортида «Толибон» ҳаракати ва уларнинг иттифоқчилари турганини қайд этган. Бироқ ҳаракат вакиллари ҳужум учун масъулиятни ўз зиммасига олмаган.
Аввал Афғонистон полицияси раҳбари Ҳожи Шайҳ Икромнинг жанозасида портлаш юз бергани хабар қилинган. Портлаш мамлакат шарқидаги Нангархар вилоятида содир бўлган. Теракт оқибатида 17 киши ҳалок бўлган ва 30 киши турли тан жароҳатлари олганди.Февраль охирида АҚШ ҳамда «Толибон» ҳаракати узоқ давом этган музокаралардан кейин ҳудудда ўт очмаслик ҳақида келишиб олган ва Афғонистон ҳукумати билан ҳам бу борада музокара олиб борилиши маълум қилинганди. Келишувнинг асосий шартларига кўра икки томон асирлар алмашинувини амалга оширмоқда.
Келишув имзолангач, Кобул қамоқхоналардаги «Толибон» ҳаракати аъзоларини озод қилиш бошланган. 2 майда Пул-э Чархи қамоғидан ташкилотнинг 100 га яқин аъзоси озодликка чиқарилганди.
Изоҳ (0)