Сурхондарё вилояти Қумқўрғон туманида 3 май, якшанба куни соат 16:30 да Captiva ва «Т-28» русумли трактор иштирокида йўл-транспорт ҳодисаси содир бўлди. Бу ҳақда Тергов департаменти хабар бермоқда.
Ҳодиса Қумқўрғон тумани «Арслонбойли» маҳалласи ҳудудидан ўтувчи 4К-596 автомобиль йўлининг 4-километрида юз берган. 73 ёшли Б.Ш. Captiva автомобили билан ҳаракатланиб келаётганида бошқарувни йўқотиб, қарама-қарши томондан келаётган 34 ёшли фуқаро А.Ж. бошқарувидаги «Т-28» русумли трактор йўлига чиқиб кетиб, йўл-транспорт ҳодисасини содир этган.
Тергов қўмитаси томонидан тақдим этилган суратларда тракторнинг кабинаси иккига бўлиниб кетгани, тиркамаси ҳам кабинасидан ажралиб кетганини кўриш мумкин.
Ҳодиса оқибатида трактор йўловчиси, 7-синф ўқувчиси Ш.Ж. тан жароҳатлари билан шифохонага ётқизилган. 13 ёшли Ш.Ж. кўрсатилган тиббий муолажаларга қарамасдан 7 май куни шифохонада вафот этган.
Мазкур ҳолат юзасидан Сурхондарё вилояти Қумқўрғон тумани ИИБ ҳузуридаги Тергов бўлими томонидан Жиноят кодексининг 266-моддаси 2-қисми (Одам ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ушбу модда билан айбдор деб топилган шахс 7 йилгача озодликдан маҳрум этилиши мумкин.
Қумқўрғондаги ҳодиса юз берган ҳафтада ЙҲХББ ва Тергов департаменти одам ўлими билан якунланган 7 та ЙТҲ ҳақида ахборот берганди. Улардан 5 таси Сурхондарё ҳудудида содир бўлган эди. Эндиликда одам ўлими билан якунланган ЙТҲлар сони ҳам, Сурхондарёдаги ҳодисалар ҳам биттага ошди.
Изоҳ (0)