Уханда янги касалланиш ҳолатлари қайд этилгани сабабли барча аҳоли ва мигрантларда коронавирусни аниқлаш учун оммавий тест ўтказиладиган бўлди. Бу ҳақда Pengpai News’га таяниб «РБК» хабар бермоқда.
Қайд этилишича, Уханда тест 10 кун давомида ўтказилиши режалаштирилган. Асосий эътибор зич жойлашган ҳудудларга қаратилади.
Уханда 26 апрель куни шаҳарда коронавирусга чалинган бирорта бемор қолмагани маълум қилинганди. Бироқ 10 май куни 1 кишида коронавирус қайд этилди. 11 майда эса 5 кишида коронавирус аниқланди. Шундай қилиб, айни пайтда 6 киши коронавирусга чалинди. Хубэй провинцияси соғлиқни сақлаш комиссияси маълумотларига кўра, улардан бири оғир аҳволда, иккинчиси эса ўлим ёқасида тургани айтилган.
Бундан ташқари, провинцияда касаллик аломатларсиз ўтаётган 11 киши аниқланган. Умумий ҳисобда бундай кишилар 615 нафар бўлиб, улар тиббий назоратда бўлиб турибди.
Хитойда умумий ҳисобда Коронавирус пандемияси бошланганидан буён 84 011 киши вирус юқтириб олган, уларнинг 79 202 нафари соғайган, 4637 нафар бемор вафот этган.
Жонс Ҳопкинс маълумотларига кўра, Хитой коронавирусга чалинганлар сони бўйича 11-ўринда турибди.
Изоҳ (0)