Саудия Арабистонининг Saudi Aramco давлат компанияси июнь ойида суткасига нефтни қазиб олиш ҳажмини яна миллион баррелга қисқартиради. Бу ҳақда мамлакат Энергетика вазирлигига таяниб, Reuters хабар берди.
Таъкидланишича, мамлакатда нефть қазиб олишнинг қисқартирилиши ОПЕК+ битими доирасида жорий этилган чекловларга қўшимча бўлади.
Шундай қилиб, Саудия Арабистонида июнь ойида нефть қазиб олиш борасидаги жами қисқаришлар суткасига 4,8 миллион баррелни ташкил этади. Мамлакат бир сутка давомида 7,5 миллион баррель нефтни қазиб олишда давом этади.
Саудия Арабистони Энергетика вазирлиги вакилининг таъкидлашича, шу орқали подшоҳлик бошқа давлатлар ҳам ОПЕК+ битими доирасидаги ўз мажбуриятларини бажаришини рағбатлантиришга ҳамда жаҳон бозорининг барқарорлашуви учун қазиб олиш ишларини қисқартиришига умид билдирмоқда.
Саудия Арабистони нефть қазиб олишни қисқартириш тўғрисидаги янгилик фонида Лондондаги ICE биржасида Brent маркасидаги нефтнинг июль ойи фьючерслари 1,3 долларга қимматлашиб, бир баррели учун 31,3 долларга етди.
Аввалроқ АҚШ президенти Дональд Трамп ОПЕК+ келишувига эришиш учун Саудия Арабистонига таҳдид қилгани тўғрисида хабарлар тарқалганди.
Мавзуга доир:
Изоҳ (0)