Россияда 12 май тонги ҳолатга кўра, коронавирусга чалинганлар сони 232 243 нафарга етди, сутка давомида касалланганлар сони 10 899 кишига ошган. Бу ҳақда коронавирусга қарши курашиш бўйича федерал штаб хабар берди.
Янги касалланиш ҳолатларининг аксарияти Москвада (5 392 та) ва Москва вилоятида (1 063 та) қайд этилган.
Эпидемия бошланганидан буён мамлакатда 2 116 киши, жумладан, ўтган суткада 107 нафар бемор вафот этди. Умумий ҳисобда 43 512 киши, сутка давомида 3 711 киши соғайди.
Шундай қилиб, Россия дунё бўйлаб коронавирусга чалинганлар сони бўйича Испания (227 минг), Буюк Британия (224 минг) ва Италияни (219 минг) ортда қолдириб, АҚШдан (1,3 миллион) сўнг иккинчи ўринга чиқиб олди.
Эслатиб ўтамиз, Россия 7 май куни коронавирусга чалинганлар сони бўйича дунёда бешинчи ўринга кўтарилганди, 11 май куни эса яна 2 поғона кўтарилиб, 3-ўринни эгаллаганди. Мамлакатда кетма-кет 9 кундан буён кунлик касалланишлар сони 10 минг кишидан ошмоқда.
Изоҳ (0)