Қорақалпоғистон Республикаси Қўнғирот туманида қиймати 390,6 миллион сўм бўлган меҳмонхона биносини давлатдан ноль қийматда олган тадбиркор уни бузиб, қурилиш материалларини ўз эҳтиёжига ишлатгани аниқланди. Бу ҳақда «Дарё»га Бош прокуратура томонидан маълум қилинди.
Бош прокуратура ҳузуридаги Иқтисодий жиноятларга қарши кураш Департаментининг Қўнғирот туман бўлими томонидан ўтказилган терговга қадар текширувда аниқланишича, «И.» МЧЖ таъсисчиси А.И. туман ҳокимлиги балансидаги қурилиши тугалланмаган, умумий қиймати 390,6 миллион сўм бўлган меҳмонхона биносини 705 миллион сўм инвестиция киритиш мажбурияти билан ноль қийматда харид қилган. Тадбиркор мазкур бинода 550 ўринга мўлжалланган таълим марказини ташкил этиш ва янги иш ўринларини яратиш мажбуриятини олган.
Бироқ тадбиркор амалда шартнома шартларини бажармасдан, корхона уставида кўрсатилган фаолиятни амалга оширмасдан, ушбу бинони бузиб, қурилиш материалларини ўз шахсий эҳтиёжларига ишлатиб юборган ҳамда жуда кўп миқдордаги мол-мулкни ўзлаштириш йўли билан талон-торож қилган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)