Ўзбекистонда коронавирус сабабли 2020/2021-ўқув йили учун олий таълим муассасаларига кириш имтиҳонларини истисно тариқасида фақат 2 та мутахассислик фанидан ўтказиш режалаштирилмоқда. Бу ҳақда Давлат тест маркази томонидан маълум қилинди.
Хабар берилишича, абитуриентларни қийнаб қўймаслик мақсадида фақат 2020/2021-ўқув йили учун истисно тариқасида қабул тест синовлари мажбурий фанларсиз, 2 та мутахассислик фанларидан ўтказилиши режалаштирилмоқда. Ушбу 2 та мутахассислик фанлари 2019 йил декабрь ойида белгиланган тартибда тасдиқланиб, кенг жамоатчиликка эълон қилинган.
Таъкидланишича, инфекция бутунлай бартараф этилмаган шароитда абитуриентларнинг 1000 ўринлик биноларда 3-4 соат қолиб кетишига йўл қўйиб бўлмайди.
Мазкур ўқув йилида тест синовлари ўтказиладиган биноларда кўпи билан 700 тагача ўрин тайёрланади, ҳар бир абитуриент учун камида 3 квадрат метр жой ажратилади. Санитария-гигиена талабларига биноан, абитуриентларнинг ниқоб, қўлқоп билан тестда иштирок этиши таъминланади. Абитуриентнинг тана ҳарорати ўлчангач, бинога киритилади. Бинолар камида 4 марта дезинфекция қилинади.
Қайд этилишича, мазкур чораларнинг бари тест топширувчилар, гуруҳ назоратчилари ва жараёнга жалб этилган бошқа шахсларнинг саломатлигини ҳимоялаш мақсадида амалга оширилади.
Қайд этилган ушбу жараён ҳам карантин чекловлари бутунлай олиб ташлангандан сўнг амалга оширилади.
Кейинги ўқув йилидан бошлаб ҳамма жараён белгиланган тартиб-қоидалар асосида бўлиб ўтади.
Эслатиб ўтамиз, Президент Шавкат Мирзиёев раислигида 30 апрель куни жорий 2019/2020 йилини сифатли якунлаш, битирув ва кириш имтиҳонларини ташкил этиш масалалари муҳокамасига бағишлаб ўтказилган йиғилишда олий таълим муассасаларига ҳужжатлар қабулини такомиллаштириб, масофадан, онлайн шаклда, интернет орқали ҳужжат топшириш имкониятини яратиш зарурлиги таъкидланганди ҳамда 2020 йилда имтиҳонларни соддароқ шаклда ўтказиш бўйича масъулларга топшириқлар берилганди.
Маълумот учун, мутахассислик фанлари абитуриент танлаган бакалавриат таълим йўналишларига мос келувчи иккита фан ҳисобланади. Ҳар бир фандан 30 тадан жами 60 та тест саволи берилади. Ҳар бир тўғри жавоб 3,1 балл билан баҳоланади. Максимал балл — 186 балл.
Изоҳ (0)