Андижон вилоятининг Шаҳрихон туманида сотувчи аёлнинг салкам 60 миллион сўмлик аёллар оёқ кийимини сотиб беришини ваъда қилиб, алдаб кетган фуқаро М.М. устидан жиноят иши қўзғатилди. Бу ҳақда «Дарё»га вилоят ИИБ ахбороти хизмати хабар берди.
Маълум бўлишича, Шаҳрихон тумани «Қоракўрпа» маҳалласида яшовчи муқаддам судланган фуқаро М.М. туманнинг «Қўрғонча» маҳалласида истиқомат қилувчи фуқаро Г.Т.нинг ишончига кириб, унинг умумий нархи 59 миллион 350 минг сўмга тенг бўлган товарларини сотиб бериш шарти билан олади. Тез орада пулини қайтаришга ваъда берганига қарамасдан маҳсулотларни сотиб, пулини ўз эҳтиёжлари учун сарфлаб юборади.
Сотувчи аёл Г.Т.нинг Шаҳрихон туман ИИБга қилган мурожаатига кўра, ҳолат бўйича М.М.га нисбатан Жиноят кодексининг 168-моддаси 2-қисми (Фирибгарлик) билан жиноят иши қўзғатилиб, дастлабки тергов ҳаракатлари олиб борилмоқда.
М.М.га айблов эълон қилиниб, қамоққа олиш эҳтиёт чораси қўлланилган.
Изоҳ (0)