Қирғизистонда коронавирус билан касалланганлар сони 1000 кишидан ошди, деб хабар бермоқда Kloop.
Қайд этилишича, 10 май куни яна 71 кишида коронавирус қайд этилган. Уларнинг 55 нафари яқинда Россиянинг Соль-Илецк шаҳридан келиб, шифокорлар назоратида бўлган қирғизистонликлардир.
Мамлакат Соғлиқни сақлаш вазирлиги уларнинг айримлари коронавируснинг хавфлилигини тушунмай шифокорлар билан зиддиятга боргани ва назорат ҳудудидан қочиб кетишга уринганидан шикоят қилган.
Бир кун аввал Қирғизистонда коронавирусга чалинганлар сони 931 кишини ташкил қилган эди. Шундай қилиб, мамлакатда коронавирусга чалинганларнинг умумий сони 1002 кишига етган бўлиб, уларнинг 232 нафари тиббиёт ходимларидир. Беморларнинг 675 нафари соғайган, 12 нафари вафот этган.
Айни пайтда касалхоналарда 260 киши даволанмоқда, уларнинг 4 нафари оғир аҳволда.
Эслатиб ўтамиз, 4 май куни Ўзбекистон Президенти Шавкат Мирзиёев Қирғизистон президенти Сўронбой Жээнбеков билан телефон орқали мулоқот қилиб, коронавирусга қарши курашдаги ҳамкорлик масалаларини муҳокама қилганди.
Изоҳ (0)