Самарқандда туҳмат, товламачилик ва ёлғон хабар беришда айбланиб, 10 йилдан ортиқ муддатга озодликдан маҳрум қилинган маҳкум Собир Хидиров (барча исм-шарифлар ўзгартирилган) кассация тартибида судга шикоят қилди. Бу ҳақда «Дарё»га Жиноят ишлари бўйича вилоят суди судьяси Баҳодир Алиқулов хабар қилди.
Маълумот берилишича, Пастдарғом тумани «Кимёгар» маҳалласида яшаган маҳкум Собир Хидиров шаръий никоҳдаги турмуш ўртоғи, фарзандлари ва келини билан 2017 йилнинг август ойидан 2018 йилнинг июнь ойигача олдиндан тузилган режа асосида бировнинг номусига тегганлик айбини қўйиш орқали фуқароларга таҳдид қилиб келган. Уюшган жиноий гуруҳга Пастдарғом тумани ИИБда профилактика инспектори лавозимида ишлаган Акмал Муродов раҳбарлик қилган.
«Дастлабки суд мажлисида Собир Хидировга Жиноят кодексининг 57-моддаси қўлланилиб, қонун санкциясида назарда тутилган озодликдан маҳрум қилиш жазосининг энг кам қисмидан ҳам камроқ жазо тайинлаш учун асослар етарли бўлмаган. Шу боис, судлов ҳайъати маҳкумнинг жазони енгиллаштиришни сўраб ёзган шикоятида келтирилган важлар суд ҳукмининг Собир Хидировга оид қисмини ўзгартириш ёки бекор қилишга асос бўлолмаслигини ҳисобга олиб, суд ҳукмининг унга оид қисмини ўзгаришсиз қолдирди», — дейди судья Баҳодир Алиқулов.
Аниқланишича, маҳкум Собир Хидиров иштирокидаги жиноий гуруҳ 2018 йил февраль ойида Мавлуда ва Мавжудани Бобур ва Қодир исмли фуқаролар билан танишиб, уларга жинсий алоқада бўлишни таклиф қилишга ундаган. Режага кўра, Мавлуда ва Мавжуда янги танишларини Мавлуда яшаб келган хонадонга олиб борган. Аёллар воқеа жойига чақирилган Даврон Шукуров, Фотима Норова ва Собир Хидиров кўз ўнгида ўзларини Бобур ва Қодир томонидан зўрлангандек кўрсатган.
Жиноий гуруҳ режасига кўра, воқеадан хабар топган профилактика инспектори Акмал Муродов эса бу хабар туҳматлигини билса-да, Мавлудадан Бобур уни зўрлаб номусига тегганлиги ҳақида ариза ёздириб олган. Мазкур аризани кейинчалик рўйхатдан ўтказмасдан, таъмагирлик ниятида товламачилик йўли билан мўмай пул ундиришни кўзлаб, Бобурнинг Matiz русумли транспорт воситаси ва ҳужжатларини гаров тариқасида олиб қолган.
Жабрланувчилар аризани қайтариб олиш, кейинчалик даъво қилмаслик ва ярашиб олгани ҳақида тилхат ёзиб бериш эвазига Бобур ва Қодирдан 2000 доллар пул талаб қилган. Ҳамда 10 миллион 200 минг сўм миқдоридаги маблағини товламачилик билан қўлга киритган.
Профилактика инспектори Акмал Муродов жиноий хатти-ҳаракатини давом эттириб, товламачилик қурбони бўлган Бобурдан жабрланувчиларнинг даъвоси йўқлиги ҳақидаги тилхат нусхасини бериб, 250 минг сўм пул олади.
Бундан ташқари уюшган жиноий гуруҳ фуқаро Жасур ва Ҳусниддин исмли шахслардан 3 миллион сўм, фуқаро Марат ва Ўралдан бир миллион сўм, Носир, Илёс ва Муроддан 550 доллар пул маблағларини товламачилик йўли билан қўлга киритган.
Шунингдек, Акмал Муродов ҳамтовоқлари билан келишиб, фуқаро Иззат ва Ботирдан мобил телефонда тасвирга олинган видеони ўчириб ташлаш эвазига 20 миллион сўм пул талаб қилиб, Иззатдан 14 миллион сўм олган.
2018 йил 17 июнь куни жиноий гуруҳ аъзоси Собир Хидиров фуқаро Имрон ва Билол исмли шахслардан ўзи суратга олган видеолавҳани тарқатиб юбориш билан қўрқитиб, уни ўчириб ташлаш эвазига 500 доллар пул талаб қилган ва пулнинг 300 долларини олаётган вақтда Самарқанд вилоят ИИБ ҳузуридаги Тергов бошқармаси ва вилоят ИИБ ЖҚБ ходимлари томонидан қўлга олинган.
Эслатиб ўтамиз, Пастдарғомда фоҳишаларга кўмаклашган профилактика инспектори Акмал Муродов Жиноят кодексининг 139-моддаси 3-қисми «а,г» бандлари, 165-моддаси 3-қисми «в» банди ва 237-моддаси 2-қисми «б,в» бандлари билан айбли деб топилиб 2 йил муддатга муайян ҳуқуқдан, яъни ички ишлар тизими ҳамда корхона, муассаса ва ташкилотларда моддий ҳамда мансабдорлик лавозимларида ишлаш ҳуқуқидан маҳрум қилиниб, 11 йил 6 ой муддатга, Собир Хидиров эса 10 йил 1 ой муддатга озодликдан маҳрум қилинганди.
Изоҳ (0)