Шавкат Мирзиёев коронавирус бўйича янги қарор имзолаши кутилмоқда

Жаҳон банки иштирокида «Ўзбекистонда коронавирус COVID-19 инфекциясига шошилинч чоралар кўриш» лойиҳасини амалга ошириш бўйича Президент қарори лойиҳаси Норматив-ҳуқуқий ҳужжатлар лойиҳалари муҳокамаси порталига жойлаштирилди.

Қарор лойиҳаси бўйича Жаҳон банки томонидан «Ўзбекистонда коронавирус COVID-19 инфекциясига шошилинч чоралар кўриш» лойиҳасини амалга ошириш учун 30 йил муддатга 5 йиллик имтиёзли даври билан жами 95 миллион АҚШ доллари миқдоридаги қарз маблағларини ажратиш маъқулланган.

Лойиҳа Ўзбекистонда соғлиқни сақлаш тизимини мустаҳкамлаш, карантин тадбирлари амал қилиши даврида кам таъминланган оилалар ва ишсизларга вақтинчалик нафақалар бериш тизимини кенгайтиришни кўзда тутади.

Жумладан, қарор билан Бандлик ва меҳнат муносабатлари вазирлигига лойиҳа доирасидаги маблағлар ҳисобидан ишсизлик бўйича бир марталик нафақаларнинг манзилли ажратилишини таъминлаш вазифаси юклатилмоқда.

Молия вазирлиги ва Соғлиқни сақлаш вазирлиги Халқаро тараққиёт уюшмаси (ХТУ)нинг кредитидан мақсадли фойдаланиш ва лойиҳани самарали амалга ошириш учун масъул ижро этувчи вазирликлар ҳисобланади.

Ижро этувчи вазирликлар ҳузурида ташкил этилган «Институционал салоҳиятни юксалтириш» лойиҳасини амалга ошириш ҳамда «Шошилинч тиббий ёрдамни такомиллаштириш» лойиҳасини амалга ошириш гуруҳлари зиммасига мос равишда қўшимча 2 ва 4 штат бирликлари қўшиш орқали лойиҳани амалга ошириш, 2 йил давомида лойиҳа доирасида амалга ошириладиган ишлар ва хизматларни мувофиқлаштириш шунингдек, лойиҳанинг ўз вақтида амалга оширилишини таъминлаш, ХТУ талабларига мувофиқ равишда маблағлар сарфини бошқариш ва ҳисобини юритиш жавобгарлиги юклатилади, дейилган қарор лойиҳасида.

Қарор лойиҳасида 11,75 миллион АҚШ долларини, жумладан, 6,88 миллион доллар миқдоридаги солиқ имтиёзлари ва 4,87 миллион доллар инвестицион давр мобайнидаги Республика бюджетидан амалга ошириладиган тўловларнинг ташкил этилиши инобатга олиниши кўзда тутилган.

Ҳужжат лойиҳасининг порталдаги муҳокамаси 22 майгача давом этади.