Тошкентдаги Вирусология илмий-текшириш институти клиникасида 10 нафар, Эпидемиология, микробиология ва юқумли касалликлар илмий-текшириш институти клиникасида 4 нафар, жами 14 нафар коронавирус инфекциясига чалинган бемор бутунлай соғайди ва реабилитацияга кузатилди. Бу ҳақда Соғлиқни сақлаш вазирлиги хабар қилган.
Вирусология илмий-текшириш институти клиникасида соғайганларнинг 8 нафари Тошкент шаҳридан, 1 нафардан бемор Қорақалпоғистон Республикаси ва Андижон вилоятида яшайди. Беморларнинг 8 нафари коронавирус инфекциясига чалинганлар билан мулоқот орқали касалликни юқтириб олган. Қолган 2 нафари Россиядан келган, карантинга олинган ва коронавирус аниқлангач, клиникага ётқизилган.
Беморларнинг 6 нафари эркак, 4 нафари аёл; энг ёши каттаси 49 да бўлса, энг кичиги 2020 йилда туғилган чақалоқ.
Эпидемиология, микробиология ва юқумли касалликлар илмий-текшириш институти клиникасида тузалганларнинг ҳаммаси эркак; 2 нафари Россиядан, 1 нафари Қозоғистондан келган ва карантинга олинган. Коронавирус аниқлангач, клиникага ётқизилган. Яна бири коронавирус инфекциясига чалинганлар билан мулоқот орқали касалликни юқтириб олган.
Ҳудудлар кесимида олинганда беморлар Тошкент, Наманган, Сирдарё ва Фарғона вилоятларида истиқомат қилади. Улар орасида энг ёши каттаси 78 ёшли отахон, энг кичиги 22 ёшда.
Тошкент шаҳри ва Тошкент вилоятида шу пайтга қадар 561 нафар бемор соғайган бўлса, эндиликда уларнинг сони 575 нафарга етди.
Ўзбекистонда 2020 йил 10 май соат 16:00 ҳолатига кўра, COVID-19 коронавирус инфекциясидан тузалганларнинг умумий сони 1870 нафарни ташкил қилмоқда. Аввалроқ Самарқандда яна 10 киши коронавирусдан тузалиб, Ўзбекистонда соғайганлар сони 1856 нафарга етганди.
Ўзбекистонда 10 май соат 15:00 ҳолатига кўра, коронавирусга чалинганлар сони 24 кишига ошиб, 2411 нафарни ташкил қилмоқда.
Ўзбекистонда 15 мартдан буён 1870 киши касалликдан соғайган, 10 киши эса инфекция асоратлари оқибатида вафот этган.
Изоҳ (0)