Сурхондарё вилоятининг Бойсун туманида 9 май куни соат 03:20 да одам ўлими билан якунланган йўл-транспорт ҳодисаси содир бўлди. Бу ҳақда ЙҲХББ хабар берди.
Ҳодиса «Шифобулоқ» маҳалласи ҳудудидан ўтувчи М-39 автомобиль йўлининг 1322-километрида юз берди. Тошкент—Термиз йўналиши бўйлаб ҳаракатланаётган «Камаз» юк машинаси ҳайдовчиси 1974 йилда туғилган Ф.Ж. бошқарувни йўқотиши оқибатида йўлнинг ўнг томонидаги бетон тўсиққа урилган ва йўлдан чиқиб кетиб ЙТҲ содир этган.
46 ёшли Ф.Ж. оғир тан жароҳатлари билан шифохонада вафот этган.
Мазкур ЙТҲ юзасидан Бойсун туман ИИБ ҳузуридаги ТБ томонидан Ўзбекистон Республикаси ЖКнинг 266-моддаси 2-қисми билан жиноят иши қўзғатилиб, дастлабки тергов ҳаракатлари олиб борилмоқда.
Эслатиб ўтамиз, бир ҳафта аввал худди шу жойда яна бир юк машинаси ЙТҲга учраши оқибатида ҳайдовчи вафот этганди. ЙҲХББ 1 май куни юз берган ЙТҲда Volvo юк машинаси ҳайдовчиси йўлнинг хавфли бурилиш қисмида тезликни меъёридан оширгани учун бетон тўсиққа бориб урилганини маълум қилганди. Авария оқибатида 30 ёшли ҳайдовчи шифохонада вафот этган.
БМТ коронавирус сабаб йўлларда ўлим ҳолати икки бараварга камайганини маълум қилди. Аммо шу ҳафтанинг ўзида Ўзбекистонда одам ўлими билан якунланган бир нечта ЙТҲ содир бўлди. 4 май куни Самарқанднинг Ургут туманида «Жигули» ва юк машинаси тўқнашиши оқибатида 22 ёшли аёл ва унинг 2 ёшли боласи, Қашқадарёнинг Ғузор туманида Lacetti асфалт ётқизиш машинасига урилиши оқибатида 31 ёшли ҳайдовчи, 5 май куни Навоий вилоятининг Навоий шаҳрида Nexia-3 автомобили светофорнинг қизил чироғидан катта тезликда ўтиб, симёғочга урилиши оқибатида 26 ёшли ҳайдовчи, Сирдарёнинг Сайхунобод туманида Matiz каналга тушиб кетиши оқибатида 31 ёшли ҳайдовчи ҳамда унинг 30 ва 22 ёшли йўловчилари, 7 май куни Қорақалпоғистоннинг Беруний туманида Nexia автобусга урилиши оқибатида 48 ёшли ҳайдовчи, Қашқадарёнинг Касби туманида Cobalt юк машинасининг ортидан бориб урилиши оқибатида 53 ёшли ҳайдовчи, 8 май куни Жиззахда Cobalt ҳайдовчиси бошқарув вақтида ухлаб қолиши оқибатида 31 ёшли ҳайдовчи, Сурхондарёнинг Шўрчи туманида Nexia дарахтга урилиши оқибатида 30 ёшли йўловчи вафот этганди.
Изоҳ (0)