Хитойда ўтган бир сутка ичида коронавирус билан касалланиш бўйича 2 та ва касаллик белгисиз ўтаётган 6 та ҳолат аниқланди, 46 нафар бемор тузалди, вафот этганлар қайд этилмади. Бу ҳақда Хитой Соғлиқни сақлаш миллий комиссиясига таяниб, «РИА Новости» хабар берди.
Янги касалланиш бўйича ҳар икки ҳолат четдан юқтирилган бўлиб, улардан бири Шанхайда, иккинчиси Гуандунда қайд этилган. Мамлакатда коронавирусни четдан юқтириш бўйича жами 1 680 та ҳолат аниқланган бўлиб, айни пайтда беморларнинг 246 нафари даволанмоқда, 5 нафари оғир аҳволда.
Коронавирус пандемияси бошланганидан буён мамлакатда 83 970 киши вирус юқтириб олган, уларнинг 78 929 нафари соғайган, 4637 нафар бемор вафот этган.
Шунингдек, яна 6 кишида касаллик аломатларсиз кечаётгани аниқланган. Умумий ҳисобда, бундай кишиларнинг яна 880 нафари шифокорлар назоратида бўлиб турибди.
Аввалроқ Хитойнинг барча ҳудудларида коронавирус тарқалиши билан боғлиқ эпидемиологик хавф пасайгани, мамлакатда коронавирус хавфи ўрта ва юқори даражада бўлган ҳудудлар қолмагани маълум қилинганди.
Жанубий Кореяда эса сўнгги сутка ичида коронавирус билан касалланиш бўйича яна 4 та ҳолат аниқланди, 86 киши тузалди, 1 киши вафот этди.Коронавирус пандемияси бошланганидан буён мамлакатда 10 810 киши вирус юқтириб олган, беморларнинг 9 419 нафари соғайган, 256 нафари вафот этган.
Шунингдек, камида 356 кишининг организмида улар тузалганидан кейин ҳам вирус сақланиб қолгани кузатилган. Апрель ойи охирларида ЖССТ вакили организмда антитана борлиги инфекция хавф солмаслигини англатмаслигини аниқланганди. Коронавирусдан тузалган одамлар қайта касалланишдан ҳимояланганликларини исботловчи далиллар йўқлиги ҳақида ЖССТ аввал ҳам огоҳлантирган.
Эслатиб ўтамиз, Жанубий Корея 6 майдан бошлаб фақат эҳтиёткорлик ва профилактика чораларига риоя қилишни кўзда тутувчи «кундалик ҳаётдаги карантин» режимига ўтди. Мактаб ва жамоат муассасалари кичик тузатишлар билан одатий фаолиятига қайтмоқда. Аммо фуқаролар вирус юқишининг олдини олиш учун масофа сақлаш, қўлларни дезинфекциялаш, ниқоб тақиш каби асосий профилактик чораларга риоя этишлари лозим.
Коронавирус билан боғлиқ эпидемиологик вазиятнинг энг юқори «қизил» даражаси ўз кучида қолади, аммо уни камайтириш масаласи шароит ўзгаришига қараб кўриб чиқилиши мумкин.
Изоҳ (0)