Коронавируснинг янги тури 2019 йил декабрь ойида маълум бўлди ва бутун дунё бўйлаб тез тарқалди. Бу ҳақда Лондон университет коллежининг генетика институти томонидан ўтказилган тадқиқотда айтилган, деб ёзмоқда Reuters.
Унда айтилишича, дунё бўйлаб 7,5 минг нафар касалланган беморларнинг биологик материалини ўрганиш натижасида SARS-CoV-2 вирусларининг умумий аждодлари бўлганлиги аниқланди.
Олимлар коронавирус пайдо бўлиш пайтини аниқ моделлаштирган ва 2019 йил охирида вирус ҳайвондан одамга ўтди деб айтишга муваффақ бўлди.«Шундай қилиб, янги вирус у аниқлангунга қадар одамлар орасида бўлгани даргумон», — деб таъкидлаган тадқиқот иштирокчиларидан бири бўлган профессор Франсуа Баллу.
Олимларнинг таъкидлашича, вирус табиий мутациялардан ўтган бўлиб, уларнинг қарийб 200 таси аниқланган. «SARS-CoV-2 борган сари ҳалокатли ва юқумли бўлиб боряптими, йўқми, ҳозирча айта олмаймиз. Шунга қарамай, мутахассислар томонидан тавсифланган мутациялар олимларга коронавирусга қарши вакциналар ва дорилар ишлаб чиқишда ёрдам бериши лозим», — деган Баллу.
Reuters тилга олган Глазго университети (Буюк Британия) томонидан ўтказилган тадқиқот SARS-CoV-2’нинг иккита штамми мавжудлигини рад этган. Март ойида хитойлик олимлар вирус икки ва ундан ортиқ штаммга эга бўлиши мумкинлигини, бири иккинчисидан юқори фаоллиги ва яшовчанлиги билан фарқ қилишини тахмин қилганди.
5 май куни АҚШ ҳукумати коронавирус пайдо бўлган жойни аниқ айта олмаслигини маълум қилганди. «У Ухандаги вирусология лабораториясида пайдо бўлганми ёки денгиз маҳсулотлари сотилувчи бозордами, биз билмаймиз», деган эди АҚШ Қуролли кучлари штаб бошлиғи қўмитаси раҳбари генерал Марк Милли. Шунингдек, далиллар унинг табиий усулда келиб чиққанини, одамлар томонидан яратилмаганини кўрсатаётгани айтилган.
Изоҳ (0)