Соғлиқни сақлаш вазирлиги Тошкентдаги 3-сонли туғруқ мажмуасида коронавирус инфекцияси қайд этилган ҳомиладор аёлнинг фарзандлиги бўлганини хабар қилди.
Хабарга кўра, мазкур туғруқ мажмуасига 2020 йил 20 мартдан буён ҳозирга қадар коронавирусга чалинганлар билан мулоқотда бўлган 57 нафар ҳомиладор аёл ётқизилган ва уларнинг 16 нафарида коронавирус инфекцияси аниқланган.
Шу вақтга қадар 3 та туғруқ бўлган, жумладан, 1 нафарида мураккаб жарроҳлик амалиёти муваффақиятли ўтказилган.
«Рости, бошида коронавирус инфекциясига оилавий чалинганимизда жуда хавотирга тушдик. Ўзимдан ҳам кўра туғиладиган фарзандимни кўп ўйладим. 3-сонли туғруқ мажмуасига олиб келишганида бу ердаги билимли ва маҳоратли тиббиёт ходимларини кўриб, кўнглим хотиржам бўлди, уларнинг меҳридан хурсанд бўлдим. Ҳозирда қизимнинг ҳам, менинг ҳам аҳволимиз яхши, соғ-саломатмиз. Фурсатдан фойдаланиб, ушбу туғруқ мажмуаси тиббиёт ходимларига чуқур миннатдорлик билдираман», — деган бахтиёр она.
Туғруқ мажмуасининг масъул ходими Комил Жумаевнинг таъкидлашича, мазкур тиббиёт муассасасида халқаро стандартлар асосида даво муолажалари олиб борилган ва айни пайтга қадар коронавирусга чалинган 14 нафар беморнинг бутунлай соғайишига эришилган, дейилади хабарда.
Аввал Тошкентда коронавирусга чалинган юраги хаста ҳомиладор аёл фарзандли бўлгани, 23 апрелда Тошкентда туғруқхонага боришга улгурмаган аёл ППХ машинасида фарзандини дунёга келтиргани, шунингдек, Қашқадарё вилояти Деҳқонобод туманида ҳомиладор аёл шифохонага вертолётда олиб борилгани, аёл ўғил фарзандли бўлгани, кейинроқ чақалоққа вилоят ҳокими совғаси топширилгани ҳақида хабарлар берилган.
Изоҳ (0)