Сирдарё вилоятидаги Сардоба сув омборида рўй берган авария сабаб эвакуация қилинган кўплаб фуқаролар зарур ҳужжатларсиз қолгани, улар Давлат хизматлари марказлари томонидан қайта расмийлаштириб берилиши хабар берилган эди.
Давлат хизматлари агентлиги матбуот хизматининг «Дарё»га маълум қилишича, сув тошқинидан жабр кўрганларнинг йўқолган ҳужжатлари дубликатларини топшириш бошланди.
Ҳалокат юз берган куннинг эртасигаёқ агентликнинг Сирдарё вилояти бошқармаси, унинг туман (шаҳар) Давлат хизматлари марказлари ва ФҲДЁ бўлимлари масъул ходимларидан иборат таркибда ишчи гуруҳлари тузилиб, Сардоба сув омбори тошқинидан зарар кўрган Сардоба, Оқолтин ва Мирзаобод тумани аҳолисининг яшаш шароитларини ўрганиш ва фуқароларнинг туғилганлик, никоҳ ва бошқа ҳужжатларининг бутлиги, йўқолган бўлса, уларни тиклаш бўйича ҳаракатлар оператив тарзда олиб борилди.
Қайд этилишича, 6 майнинг ўзида Гулистон шаҳридаги Олимпия заҳиралари коллежи, Гулистон академик лицейи, Гулистон мусиқа ва санъат мактаб-интернати, Гулистон тиббиёт коллежи биноларига эвакуация қилинган фуқаролардан 60 нафарига такрорий гувоҳномалар топширилган.
Қайта тикланган ҳужжатлар ҳеч қандай тўловларсиз расмийлаштирилиб берилмоқда.
Эслатиб ўтамиз, Сирдарё вилоятидаги Сардоба сув омборида 1 май тонгида юз берган фалокатдан сўнг 70 мингга яқин фуқаро хавфсиз ҳудудларга кўчирилгани, камида 56 киши турли даражада тан жароҳати олиб, касалхоналарга ётқизилгани, 300 киши вертолётлар воситасида қутқарилгани ҳақида хабар берилган эди.
Айни пайтда Сирдарё вилоятининг сув босган жойларида вазият тобора яхшиланмоқда, тошқин бўлган ҳудуднинг катта қисмида сув камайган. Жиззахнинг Дўстлик туманига эвакуация қилинган 900 нафарга яқин сирдарёликлар вазият барқарорлашгани учун ўз уйларига қайтарилган. Вилоятнинг Оқолтин ва Мирзаобод туманларидаги аҳоли яшаш пунктларига ҳам 16,2 минг киши уйларига қайтиб келди.
Изоҳ (0)