Сирдарё вилоятининг сув тошқинидан зарар кўрган Сардоба, Оқолтин ва Мирзаобод туманларида 50 та кўп қаватли уй қуриш режалаштирилмоқда. Қуриладиган уйлардаги квартиралар уйларига жиддий зарар етган фуқароларга бепул тақдим этилади. Бу ҳақда Сирдарё вилояти ҳокимлигига таяниб, «Gazeta.uz» хабар берди.
Президент Шавкат Мирзиёев 1 май куни «Сирдарё вилоятида жойлашган Сардоба сув омбори тўғонида юзага келган фавқулодда ҳодиса оқибатларини бартараф этиш бўйича кечиктириб бўлмайдиган чора-тадбирлар тўғрисида»ги фармойишни имзолаган.
Ушбу фармойишга мувофиқ, Сирдарё вилоятидаги Сардоба сув омбори тўғонидан сув тошиши оқибатларини бартараф этиш ва ҳодиса сабабларини ўрганиш бўйича бош вазир Абдулла Арипов раҳбарлигида ҳукумат комиссияси тузилган.
Президент маслаҳатчиси, фавқулодда вазиятлар вазири Турсинхон Худойберганов, бош вазирнинг аграр ва озиқ-овқат соҳаларини ривожлантириш бўйича ўринбосари Ўктам Барноев ва Сирдарё вилояти ҳокими Ғофур Мирзаев комиссия раисининг ўринбосарлари этиб тайинланди. Комиссия таркибига бош прокурор Ниғматилла Йўлдошев, мудофаа вазири Баҳодир Қурбонов, қурилиш вазири Ботир Зокиров, молия вазири Тимур Ишметов, «Ўзбекистон темир йўллари» раиси вазифасини бажарувчи Ҳусниддин Ҳосилов ва бошқалар киритилган. Бош вазирнинг биринчи ўринбосари Очилбой Раматов комиссия таркибига киритилмаган.
Комиссия олдига юз берган фалокат оқибатларини бартараф этиш, етказилган зарар миқдорини ҳисоблаш, эвакуация қилинган фуқароларга ёрдам кўрсатиш, қурилиш ишлари ҳажмини аниқлаш, қишлоқ хўжалигидаги йўқотишлар ўрнини қоплаш ва суғориш тизимларини қайта тиклаш, тўғон ёрилишининг сабабларини ўрганиш каби вазифалар қўйилган.
Фармойишга мувофиқ, бошқарув органлари ва сектор раҳбарларига тошқин юз берган ҳудудларда суткалик навбатчилик ташкил қилиш бўйича топшириқ берилган
Молия вазирлиги томонидан юз берган фавқулодда ҳодиса оқибатларини бартараф этиш учун Сирдарё вилояти маҳаллий бюджетига дастлабки 100 миллиард сўм миқдорида маблағ ажратиш бўйича кўрсатма берилган. Зарур ҳолларда бу сумма оширилиши мумкин.
Қурилиш вазирлиги Сирдарё вилояти ҳокимлиги билан биргаликда икки ҳафта ичида малакали пудратчилар ўртасида танлов ўтказиши ва ғолиблар билан кўп қаватли уй-жой қурилиши бўйича шартнома тузиши керак.
Сирдарё вилоят ҳокимлиги уйлари тошқин сабабли жиддий зарар кўрган фуқароларнинг рўйхатини тузиши ҳамда уларга давлат бюджети ва бошқа молиялаштириш манбалари, шу жумладан, мақсадли давлат маблағлари ва бюджетни қўллаб-қувватлаш учун жалб қилинадиган халқаро молия институтларининг кредитлари ҳисобидан қуриладиган янги кўп қаватли уйлардан бепул хонадонлар ажратиши керак.
Сув хўжалиги ва Қурилиш вазирликларига Сардоба сув омборини тиклаш бўйича ишлар режасини ишлаб чиқиш, тўғондан сув оқишининг олдини олиш ва сув омборининг бузилган қисмини реконструкция қилиш топширилди.
Мавзуга доир: «‘Бажарамиз’, ‘ест’ қиламиз, деган одамлар энди ишлолмайди. Кўп одамлар билан хайрлашаман» — Шавкат Мирзиёев
Воқеа юз берган куниёқ Президент Шавкат Мирзиёев Сирдарё вилоятига етиб борди. У сув тошқини оқибатларини кўздан кечирди, офатдан жабрланган аҳоли билан мулоқотда бўлди, шароит яхшиланмагунича ҳеч бир раҳбар ҳеч қаерга кетмаслигини таъкидлади. Аллақачон қайта тикланиши бошланган тўғонни бир неча бор бориб кўрди, иш жараёни билан танишди.
Тўғоннинг ёрилиши юзасидан жиноят иши қўзғатилган.
Изоҳ (0)