Навоий вилоятида 25 минг АҚШ долларига сохта симоб моддасини сотмоқчи бўлган икки фуқаро қўлга олинди. Бу ҳақда вилояти ИИБ ахборот хизмати хабар берди.
Маълумотларга кўра, Навбаҳор туманида истиқомат қилувчи фуқаролар — В.Д. ҳамда К.Б.нинг олдиндан жиноий тил бириктириб, яширин хатти-ҳаракатлар содир этаётгани Навоий вилояти ИИБ ЖҚБ ходимларининг эътиборини тортган.
Вазиятга аниқлик киритиш мақсадида ўтказилган тезкор тадбир давомида қоидабузарлар ўзганинг мол-мулкини фирибгарлик йўли билан қўлга киритиш мақсадида 25 минг АҚШ долларига симоб моддасини сотаётган вақтида қўлга олинди.
Адлия вазирлиги ҳузуридаги Х.Сулаймонова номидаги РСЭМнинг суд кимёвий экспертизаси хулосасига кўра, фуқаролар таркибида бирор бир кучли таъсир қилувчи ва ядровий моддалари мавжуд бўлмаган моддани қалбаки симоб моддаси сифатида сотганлиги маълум бўлган. Тадбир иштирокчилари томонидан холислар иштирокида далилий ашёлар тегишли тартибда расмийлаштирилиб, мусодара қилинган.
Мазкур ҳолат юзасидан В.Д. ҳамда К.Б.га нисбатан Жиноят кодексининг 168-моддаси 4-қисми «а» банди (Фирибгарлик) билан жиноят иши қўзғатилиб, айни пайтда дастлабки тергов ҳаракатлари олиб борилмоқда.
Изоҳ (0)