Ўзбекистон Фавқулодда вазиятлар вазирлиги ходимлари тошқин оқибатларини бартараф этишда ёрдам бериш учун Қозоғистоннинг Туркистон вилояти Мақтаарал туманига етиб борди. Бу ҳақда Қозоғистон Республикаси Фавқулодда вазиятлар қўмитаси матбуот хизматига таяниб, Sputnik хабар берди.
205 нафар ходим ўзлари билан турли хил техника — ўт ўчириш машиналари, экскаваторлар, тракторлар, сув насослари, юк ташиш машиналари ва фуқароларни ташиш учун автобуслар олиб борган.
«Қўшни давлатдан келган ишчи гуруҳ тошқин сувларини тортиб олишга, каналларни оқизишга ва тўғонлар қуришга ёрдам беради. Шунингдек, улар уй-жой қурилишида иштирок этади», — дейилган хабарда.
7 май куни Қозоғистон ИИВ ФВҚ барча куч ва воситаларини Оргебас посёлкасидаги сувларни чиқариб олишга йўналтирган. Чунки бошқа аҳоли пунктларида тўпланган сувлар айнан ушбу посёлкага оқиб келмоқда. Сўнгги маълумотларга кўра, 1,38 миллион куб метрдан ортиқ сув насослар ёрдамида чиқариб ташланган.
Нурлийўл, Жаннаттурмуш, Женис, Дўстлик қишлоқларида ҳам сувни чиқариб ташлаш бўйича, шунингдек, аҳолининг шахсий буюмлари, ҳужжатлари ва мулкларини эвакуация қилиш ишлари давом этмоқда.
Қутқарув-қидирув ишларига 1308 киши, 220 та техника, 15 сузувчи восита, 46 та мотопомпа жалб этилган.
Мавзуга доир:
- Қозоғистон бош вазир ўринбосари Сардобадаги фалокатни ўрганиш учун Сирдарёга келди
- Қозоғистон Ўзбекистон билан чегарани очмоқчи — ўзбекистонлик мутахассислар тошқин оқибатларини бартараф этишда ёрдам бериши учун
- Қозоғистон ҳукумати вакили: Ўзбекистон Сардоба сув омборининг қурилишини биз билан келишмаган
Ўзбекистон Президенти Шавкат Мирзиёев Сардобадаги техноген офат туфайли Қозоғистоннинг жанубий қисмидаги ҳудудлар ҳам зарар кўргани, Ўзбекистон ҳукумати мазкур офат оқибатларини бартараф этиш бўйича қўшни давлат билан яқиндан ҳамкорлик қилишини айтиб ўтганди.
Тўғоннинг ёрилиши юзасидан жиноят иши қўзғатилган.
Изоҳ (0)