Qozog‘iston mamlakat janubidagi Turkiston viloyatida kuzatilgan suv toshqinlari oqibatlarini bartaraf etish uchun O‘zbekiston bilan chegarani ochishni rejalashtirmoqda. Bu haqda hukumat yig‘ilishida Turkiston viloyati hokimi Umirzoq Shukeyev ma’lum qilgan, deya xabar bermoqda Tengrinews.
“Qog‘ali aholi punkti yaqinida qo‘shimcha kanallar qazamiz. Kecha, 4-may kuni O‘zbekistonga tashrifimiz davomida bu haqda kelishib oldik. Umuman olganda, hozir o‘zbekistonlik mutaxassislar bilan yaqin hamkorlikda ishlayapmiz”, — dedi u.
“Vaziyat barqarorlashganidan so‘ng, ular viloyatimizga o‘z texnikalari bilan keladi, ya’ni kollektorlarimizni tozalashda bizga yordam beradi. Biz esa o‘z tomonimizdan chegarani ochishimiz kerak”, — dedi Shukeyev.
Hokimning qo‘shimcha qilishicha, Turkiston viloyatida suv toshqinlari xavfi saqlanib qolmoqda.
Ma’lumot uchun, Qozog‘iston janubidagi suv toshqinlari 1-may kuni O‘zbekistonning Sirdaryo viloyatida joylashgan Sardoba suv ombori to‘g‘onining o‘pirilishi oqibatida kelib chiqdi.
2-mayga o‘tar kechasi O‘zbekiston bilan chegaradagi Maqtaaral tumanida kollektor Sardoba tomondan kelgan suv hajmiga bardosh bera olmay yorilib ketgan va oqibatda Qozog‘istondagi kamidagi 10 ta aholi punkti suv ostida qolgan. Jami 31,6 ming kishi evakuatsiya qilingani aytilmoqda.
Mavzuga doir: