Россияда коронавирусга чалинганлар сони 165 минг кишидан ошди, 1537 нафар бемор вафот этди

Россияда сўнгги бир сутка ичида 10 559 кишида коронавирус аниқланиб, касалланганларнинг умумий сони 165 929 нафарга етди, деб хабар бермоқда «РБК» Касалликка қарши кураш бўйича тезкор штабга таяниб.

Умумий ҳисобда Россияда 1 537 киши вафот этган, 21 327 нафари соғайган. Мамлакатда қаторасига 4 кундан бери ҳар суткада 10 мингдан ортиқ кишида коронавирус аниқланмоқда. 3 май куни 10 633 та, 4 май куни 10 581 та ҳолат аниқланган бўлса, 5 май куни 10 102 кишида коронавирус қайд этилган.

Қайд этилишича, янги касалланганларнинг 40 фоизида касалликнинг клиник белгилари кузатилмаган. Сўнгги суткада қайд этилган касалланиш ҳолатларининг энг кўпи — 5 858 таси Москва шаҳрида аниқланган. Шунингдек, беморларнинг 312 нафари Москва вилоятидан, 829 нафари Санкт-Петербургдандир.

Москва коронавирусга чалинганлар сони ортиши бўйича ҳам мамлакатда биринчи ўринда — пойтахтда шу кунгача 85 973 киши коронавирусга чалингани қайд этилган.

Вирусологлар касалланганлар сонининг ортиши уни аниқлаш бўйича ўтказилаётган тестлар сонининг ортгани билан боғлиқ бўлиши мумкин, деб ҳисобламоқда. 5 май ҳолатига кўра, Россияда коронавирусни аниқлаш бўйича 4,4 миллионта тест ўтказилган.