Хитойнинг БМТ ва бошқа халқаро ташкилотлардаги доимий вакили Чэнь Сюйнинг маълум қилишича, коронавируснинг тарқалганини яшириш мақсадида Хитойнинг Жаҳон соғлиқни сақлаш ташкилоти билан ўзаро келишгани ҳақидаги айбловлар асоссиз ҳисобланади. Бу ҳақда «ТАСС» хабар берди.
«Биз маълум бир миш-мишларга, баъзи мавҳумий ва кулгили тасдиқларга эътибор қаратдик. Баъзилар ҳатто ҳуқуқий таъқиб йўли билан Хитойни жавобгарликни тан олишга мажбур қилиш ҳақида фикр билдирди», — дея маълум қилган Хитой вакили.
Унинг қўшимча қилишича, бундай фикрлар билдирилишининг сиёсий сабаблари мавжуд. Чэнь Сюй бундай айбловлар панемияга қарши кураш бўйича халқаро ҳаракатларга ёрдам беришига шубҳа билдирган.
АҚШ президенти Дональд Трамп 29 апрель куни Америка махсус хизматларига ЖССТ ва Хитойнинг эҳтимолий келишуви юзасидан суриштирув олиб бориш бўйича топшириқ берган. Унинг фикрича, ЖССТ ва Хитой коронавирус ҳақидаги маълумотни яширган бўлиши мумкин.
Апрель ойида АҚШ янги турдаги коронавирус қандай пайдо бўлгани ва Хитой нима учун вирус тарқалишини дарҳол тўхтата олмагани юзасидан кенг қамровли суриштирув бошлаган. АҚШ разведкаси вируснинг табиий ҳолда келиб чиққанини маълум қилган ва унинг сунъий равишда яратилмаганини билдирган.
Сўнгги маълумотларга кўра, дунёда коронавирусга чалинган 3,66 миллион киши қайд этилган. 257 288 киши касаллик қурбонига айланган, 1,19 миллион бемор тузалишга муваффақ бўлган.
Аввалроқ Fox News телеканали коронавируснинг Уханда лаборатория шароитида яратилганини тахмин қилганди. Дональд Трамп ҳам коронавирус лабораторияда яратилганини исботловчи далиллари борлигини билдирган. АҚШ давлат котиби Майкл Помпео Хитой касаллик тарқалиши юзасидан муҳим ахборотга эга бўлгани, аммо уни ўз вақтида ошкор қилмаганини айтган.Бунга жавобан ЖССТ АҚШ коронавирус лабораторияда яратилгани тўғрисида ҳеч қандай маълумот тақдим этмаганини, коронавирус Хитой лабораторияларида пайдо бўлгани тўғрисидаги баёнотни спекулятив деб айтган.
Австралиянинг The Daily Telegraph нашри АҚШ, Буюк Британия, Канада, Австралия ва Янги Зеландия махсус хизматларини бирлаштирувчи «Беш кўз» разведка альянси томонидан тайёрланган 15 варақли ҳисоботга таяниб, Хитой COVID-19 коронавирус инфекциясига оид далилларни қасддан йўқ қилиб юборганини ёзганди.
The Guardian ғарб махсус хизматларида Хитой коронавирус ҳақидаги маълумотларни яширганлигига оид далиллар йўқлигини, Австралия газетадаги маълумотлар «Беш кўз» разведка альянсидан эмас, АҚШнинг ўзидан келганини билдирган.
Изоҳ (0)