АҚШ Қуролли кучлари штаб бошлиғи қўмитаси раҳбари генерал Марк Миллининг айтишича, Америка ҳукумати COVID-19 коронавируси айнан қаердан келиб чиққанини билмайди. «ТАСС»нинг ёзишича, бу ҳақда у Пентагондаги брифинг вақтида айтиб ўтган.
«Далиллар унинг табиий усулда келиб чиқанини, одамлар томонидан яратилмаганини кўрсатмоқда. Иккинчи масала — унинг тарқалиши тасодифан бўлганми, атроф-муҳитга табиий усулда тарқалганми ёки бу қасддан қилинганми? Бизда бу нуқтаи назарлардан бирини исботловчи далиллар йўқ. Мавжуд далиллар унинг табиий усулда келиб чиққанини, атайин тарқатилмаганини кўрсатмоқда. Учинчи масала — пайдо бўлган жойи. У Ухандаги вирусолигия лабораториясида пайдо бўлганми ёки денгиз маҳсулотлари сотилувчи бозордами, биз билмаймиз», — деган Милли.
Аввалроқ Fox News телеканали коронавируснинг Уханда лаборатория шароитида яратилганини тахмин қилганди. Дональд Трамп ҳам коронавирус лабораторияда яратилганини исботловчи далиллари борлигини билдирган. АҚШ давлат котиби Майкл Помпео Хитой касаллик тарқалиши юзасидан муҳим ахборотга эга бўлгани, аммо уни ўз вақтида ошкор қилмаганини айтган.
Бунга жавобан ЖССТ АҚШ коронавирус лабораторияда яратилгани тўғрисида ҳеч қандай маълумот тақдим этмаганини, коронавирус Хитой лабораторияларида пайдо бўлгани тўғрисидаги баёнотни спекулятив деб айтган.
Австралиянинг The Daily Telegraph нашри АҚШ, Буюк Британия, Канада, Австралия ва Янги Зеландия махсус хизматларини бирлаштирувчи «Беш кўз» разведка альянси томонидан тайёрланган 15 варақли ҳисоботга таяниб Хитой COVID-19 коронавирус инфекциясига оид далилларни қасддан йўқ қилиб юборганини ёзганди.
The Guardian ғарб махсус хизматларида Хитой коронавирус ҳақидаги маълумотларни яширганлигига оид далиллар йўқлигини, Австралия газетадаги маълумотлар «Беш кўз» разведка альянсидан эмас, АҚШнинг ўзидан келганини билдирган.
Изоҳ (0)