Тожикистон президенти Эмомали Раҳмоннинг даволаниш учун Германияга кетгани ҳақидаги хабарлар рад этилди. Тожикистон президентининг маслаҳатчиси Абдужаббор Раҳмонзоданинг маълум қилишича, бу хабарлар ҳақиқатга тўғри келмайди. Бу ҳақда «Интерфакс» хабар берди.
Тожикистон Соғлиқни сақлаш вазирлиги 30 апрель куни мамлакатда коронавирусга чалиниш бўйича дастлабки ҳолатлар қайд этилганини тасдиқлаган. 4 май куни эса Тожикистоннинг расмий ОАВлари мамлакатда 230 киши коронавирусга чалингани ва уч киши мазкур касалликдан вафот этгани ҳақида хабар берган.
Раҳмонзоданинг маълум қилишича, коронавирусга қарши курашиш ва унинг устидан ғалаба қозониш учун ҳукумат атрофида бирлашиш керак бўлган бир вақтда, тожик мухолифати вакили Шарофиддин Гадоев хориждан туриб Тожикистон президентининг бетоб эканлиги ва Германияга жўнатилгани ҳақида ёлғон хабар тарқатмоқда.
Президент маслаҳатчисининг билдиришича, Эмомали Раҳмон айни пайтда ўз иш жойида.
Маълум қилинишича, Шарофиддин Гадоевнинг хабарида таъкидланган Phoenix Air компаниясининг Gulfstream G-III самолёти Душанбега Тожикистон ҳукуматининг рухсати билан 3 май куни Германиядан инсонпарварлик ёрдамини олиб келган.
Маълумот учун, Ўзбекистон Президенти Шавкат Мирзиёев 5 май куни Тожикистон президенти Эмомали Раҳмон билан телефон орқали мулоқот қилган. Мулоқот чоғида давлат раҳбарлари коронавирусга қарши кураш масаласи ҳамда Сардобада юз берган фалокатни муҳокама қилган.
Изоҳ (0)